Ұлыбританияға жұмысқа орналастырамын деп 80 адамның 40 миллион теңгесін қағып алған

Көкшетау тұрғыны екі қолға бір күрек таппай жүрген 80 адамды алдап, Ұлыбританияда жұмысқа орналастырамын деген уәдемен 40 млн теңгені қалтаға басқан, деп хабарлайды Orda.kz.      

Иә, дәл осы алданған 80 адам бұл күнде жәбірленуші болып танылды.

Көкшетау қаласының тұрғыны шетелден болса да нәпақа тапсам деп үміттенген азаматтарды жұмысқа орналастырамын деп бір топ адамның «аузын айға қаратқаны» жайлы Ақмола облысының полиция департаменті мәлімдеді.

«Сотқа дейінгі тергеу барысында 2023 жылдан 2026 жылдың қаңтарына дейін Көкшетау тұрғыны Instagram әлеуметтік желісі арқылы азаматтарға Ұлыбританияда жұмысқа орналастыру бойынша ақылы қызмет ұсынғаны анықталды. Виза рәсімдеу, медициналық сақтандыру, биометриялық процедуралардан өту және басқа да қызметтерді сылтау етіп, күдікті азаматтардан ақша алған, алайда іс жүзінде ешкімді жұмысқа орналастырмаған. Қаражат оған банктік аударымдар арқылы да, қолма-қол түрде де берілген» деп жазылған хабарламада. 

Қазіргі уақытта жәбірленуші ретінде танылған 80 адам бар. Дегенмен алаяқтың құрығына іліккендер одан да көп болуы мүмкін. Қазақылыққа салынып, аз ақша бергендер арыз жазбауы да ғажап емес. Әзірге келтірілген жалпы шығын көлемі 40 миллион теңге. Күдікті үйқамаққа алынған.

Полиция қызметкерлері азаматтарды шетелде жұмыс іздеу кезінде сақ болуға шақырды.

Оқи отырыңыз:

• Алматы облысында Кореяға жұмысқа орналастыратын арнайы орталық ашылады
• «Елдегі жоқшылық»: Қазақстандықтар неге шетелге кетіп жатыр?
• Бас прокуратура: «Шетелде табыс табамын деп құлдыққа түсу қаупі бар»