«Қызымды бірден тани алмадым»: Фельдшер Ұлдананың анасы сотта көз жасына ерік берді

Астанада өтіп жатқан фельдшер Ұлдана Мырзуанның анасы сот алдында жауап беріп, көз жасына ерік берді. Сәлима Омарованың айтуынша, қызы соншалықты ауыр хәлде жатқандықтан жансақтау бөлмесінде оны тани да алмапты, деп хабарлайды Orda.kz.

Сотта марқұм фельдшер Ұлдана Мырзуанның анасы Сәлима Омарова жауап берді. Омарова сұрақтарға жауап бере бастағанды көз жасын тия алмады. Қайғылы оқиға болған күнді айтып, екеуі таңда видеоқоңырау арқылы сөйлескеннін жеткізді.

«Мен сол күні азық-түлік сатып алуға баруым керек еді, қызыммен таңертең сөйлесіп болған соң дүкенге шықтым. Шамамен 20-30 минуттық жерде орналасқан дүкенге келіп сауда жасадым. Дүкенде тұрғанымда құдағи қоңырау шалып қызымның үстіне қабырға құлап кеткенін айтты. Содан не істерімді білмей қалдым сол жерде», – деді марқұмның анасы.

Анасының айтуынша, Ұлдана әр шақыртудан кейін аман-есен шықтым деп анасына амандығын жеткізіп отырады екен. Сол күні сондай хабар жеткенде қазір ғана сөйлестім ғой деп естіген суық хабарға сенбеген. Омарова  Астанаға билет алып сол күні ұшып келген. 

«Мен барғанда отадан енді шыққан екен реанимацияда жатқан соң кіргізбеді. Таңда кіруге рұқсат берді, мен қызымды тани алмадым, сол жерде жатқан адамдардың ішінен қызымды іздедім. Сөйтсем қасымда жатыр екен. Оны түрін көріп, тани алмадым, мен оны мұндай нашар хәлде көремін деп ойламадым. Қызыма көп нәрсе айтқым келді, оны сүйіп бар тілегімді айттым», – деді көз жасын тия алмаған Омарова. 

Сонымен қатар, сотта Омарова күйеу баласы алған 20 миллион теңгенің небары 4,5 миллионын алғанын, артынша арада біраз уақыт өткен соң құдағи хабарласып қайтарып бермесең сотқа берем деп айтқанын жеткізді.

«Менің ең жаныма батқаны құдағи ол ақшаны жеке өзінің қалтасынан шыққандай сұрады. Ол ақша түптеп келгенде не оған, не маған тиесілі емес. Ол Ұлдананның қарыздары өтелсін деп берілген қаражат», – деді ашынған ана.

Түстен кейінгі сот отырысында осы іс бойынша денсаулығы көп зардап шеккен екінші жәбірленуші жауап берді. Келесі сот отырысы 24 тамызға қалдырылды.

Еске салайық, 23 жастағы Ұлдана Мырзуан 8 қарашада шақыртуға барған кезде қасбет элементтері мен кондиционердің бекітпесі оның үстіне құлап, зардап шеккен. Ол 10 күн жансақтау бөлімінде жатып, кейін қайтыс болды.

Оқи отырыңыз:

«Жаңа өмір бастадым»: Ұлдана Мырзуанның бұрынғы күйеуі неге жәбірленуші мәртебесінен бас тартқанын айтты

Фельдшер Ұлдана Мырзуанның өлімі: Қорғау тарабы судьяға қарсылық білдірді