Украина астанасында Жамбыл Жабаевтың ескерткішін құлата ма?

Киевте қазақ ақыны Жамбыл Жабаевтың ескерткішін сүріп тастау бойынша Украинаның ұлттық жады институты жауап берді, деп хабарлайды Orda.kz.

Украина ұлттық жады институтының басшысы Александр Алферовтің айтуынша, Киевте Жамбыл Жабаевтың есімін ұлықтау — коммунистік тоталитарлық режимге немесе Ресей империялық саясатына еш қатысы жоқ. Украиналық институттың жауап беруіне Қазақстандағы «Демос» қоғамдық бірлестігінің жетекшісі Тұрарбек Құсайыновтың өтініші себеп болған. Бұған дейін Құсайынов Киевтегі Жамбыл ескерткішін алып тастап, оның аты берілген көшені басқаша атауды ұсынған.

Альферов өз жауабында институт Жамбыл Жабаевтың Ресей империялық саясатын жүзеге асыруға қатысқаны немесе соған ықпал еткені туралы дәлел таппағаннын айтты. Украина заңында «ресейлік империялық саясат» деген ұғым украин халқын бағындыру, қанау, ассимиляциялау сияқты әрекет ретінде түсіндіріледі. УҰЖИ-дің пайымдауынша, Жамбылдың мұндай саясатқа қатысы жоқ.

«Тәуелсіз Украинада Жамбыл Жабаевтың есімін көшеге беру және Киевте ескерткіш орнату коммунистік тоталитарлық режимді немесе Ресей империялық саясатын дәріптеу болып саналмайды. Бұл нысандар империялық немесе коммунистік символикаға жатпайды, керісінше украин және қазақ халықтары арасындағы мәдени байланыстар мен достық дәстүрін көрсетеді», — деп жауап берді Александр Альферов.

Айта кетейік, Киевте Жамбыл Жабаевтың құрметіне ескерткіш орнатылған және оның атымен көше бар. Бұл ескерткіш Нивки саябағында орналасқан. 2008 жылы қала кеңесі бір көшені Жамбыл Жабаевтың атымен атаған, бұл көшеге 2009 жылы естелік тақта қойылған. 

Оқи отырыңыздар:

• Қырғызстанда парламент спикері отставкаға кетті
• Дүниежүзілік банк Қазақстанға алты жыл бойы 1 млрд АҚШ долларына дейін қаржы бөлуге дайын
• Қазақстан Қырғызстаннан жерді 49 жылға не үшін жалға алмақшы?