Түрме ішінде қылмыстық топ құрып, ақша бопсалағандар жаза қосып алды

Алматы облысындағы Заречный кентінде орналасқан №14 колонияда сотталғандар өздерінше топ құрып, екі жыл бойы өзге тұтқындардан ақша бопсалап келген,деп хабарлайды Orda.kz. 

Ақша беруден бас тартқандарды ұрып-соғып, қорқытып отырған. Енді бұл топ мүшелері ұзақ мерзімге сотталды.

Алматы облысы прокуратурасының мәліметінше, бұл топ 2022–2024 жылдар аралығында жұмыс істеген. Бірнеше сотталған адам бірігіп, ұйымдасқан қылмыстық топ құрып, басқа жазасын өтеушілерден тұрақты түрде ақша жинап отырған.

Қаражатты олар банктік карталарға және мобильді қосымшалардағы шоттарға аударуды талап еткен. Бас тартқан жағдайда жәбірленушілерге қорқыту, ұрып-соғу және қорлау әрекеттері жасалған.

Сот алдында барлығы он адам жауапқа тартылды. Сот оларды ұйымдасқан қылмыстық топ құру, бопсалау және алаяқтық баптары бойынша кінәлі деп таныды.

Айыпталушылардың әрқайсысына 10 жылдан 15 жылға дейін бас бостандығынан айыру жазасы тағайындалды.
Үкім әзірге заңды күшіне енген жоқ.

Оқи отырыңыз:

• Әдептік кеңес БҚО-да мас болып қызметтік көлік жүргізген әкімді жұмыстан шығаруды ұсынды
• Қазақстанда екі жыл халықаралық іздеуде жүрген 27 қылмыстық топ ұсталды
• Қылмыстық амнистия: 16,5 мың адамның төрт мыңнан астамы қылмыстық жауапкершіліктен толық босатылады