Әдептік кеңес БҚО-да мас болып қызметтік көлік жүргізген әкімді жұмыстан шығаруды ұсынды

Батыс Қазақстан облысында қызметтік автокөлікті мас күйде жүргізген ауыл әкіміне қатысты тәртіптік іс Әдеп жөніндегі кеңесте қаралды, деп хабарлайды Orda.kz.

17 маусым күні Мемлекеттік қызмет істері агенттігінің БҚО бойынша департаменті жанындағы Әдеп жөніндегі кеңестің кезекті отырысы өтті. Онда Ақжайық ауданы Чапаев ауылдық округінің әкімі Биболат Зинуллинге қатысты тәртіптік іс қаралды.

Департамент басшысының орынбасары Дәурен Хаировтың айтуынша, оқиға биыл 12 наурызда болған. Полиция қызметкерлері әкімді жұмыс уақытында қызметтік көлікті  мас болып айдап келе жатқан жерінен тоқтатқан. Әкімшілік құқық бұзушылық туралы хаттама оның өзі басқаратын Чапаев ауылдық округінде толтырылған.

«Біз сот шешімдері мен бұқаралық ақпарат құралдарына тұрақты мониторинг жүргіземіз. Бұл дерек әкімшілік құқық бұзушылықтар базасынан белгілі болды. Бірінші сатыдағы сот оның пайдасына шешім шығарып, ақтаған болатын. Алайда апелляциялық инстанция бұл шешімді қайта қарап, бірінші сот қаулысының күшін жойды»,  деді Дәурен Хаиров.

Әдеп жөніндегі кеңес  Биболат Зинуллинді қызметінен босатуды ұсынды.

Кеңес отырысында әкімнің бұған дейін де тәртіптік жаза алғаны айтылды. Ол кезде оған «қызметіне толық сәйкес еместігі туралы ескерту» түріндегі тәртіптік жаза қолданылған. Өткен жылдың қазан айында Әдеп жөніндегі кеңес оның ісін қарап, аяқталмаған нысан үшін бюджет қаражатын аудару фактісін талқылаған еді.

Оқи отырыңыз: 

• Елімізде найзағай ойнап, аптап ыстық +43 градусқа дейін көтеріледі
• Әскери кафедрада оқығандар екі жылдық қызметке шақырыла ма?