Түркістан полициясы журналистің ұрланған көлігін бірнеше сағат ішінде тауып берді

Түркістан қалалық полиция басқармасына жергілікті журналист жүгініп, жұмыс орнының алдында тұрған өзіне тиесілі автокөлікті белгісіз біреу заңсыз айдап кеткені туралы арызданған, деп хабарлайды Orda.kz.       

Аталған дерек бойынша полиция бірден Қылмыстық кодекстің тиісті бабы бойынша сотқа дейінгі тергеп-тексеруді бастады. Бейнежазбада көрініп тұрғандай оқиға орны мұқият қаралып, іздер тіркелді, сондай-ақ қала аумағындағы бейнебақылау камераларының жазбалары толықтай зерделенді.

Жедел-іздестіру іс-шаралары нәтижесінде автокөлікті заңсыз айдап кеткен күдікті бірнеше сағат ішінде анықталып, ұсталды. Ол Түркістан қаласының жұмыссыз тұрғыны екені белгілі болды. Қазіргі уақытта күдікті уақытша ұстау изоляторына қамалып, оның осыған ұқсас өзге де құқықбұзушылықтарға қатысы бар-жоғы тексеріліп жатыр.

Полиция мәліметінше, соңғы уақытта автокөлікті заңсыз айдап кету фактілері көбіне көлікті қараусыз қалдыру немесе қауіпсіздік талаптарын сақтамау салдарынан орын алады. Осыған байланысты құқық қорғау органдары азаматтарға көліктерін қараусыз қалдырмауға, міндетті түрде сигнализация жүйесін орнатуға және есіктерін құлыптап жүруге кеңес береді.

Айта кетейік, Қазақстан Республикасының заңнамасына сәйкес, көлікті айдап кету (ұрлау мақсатынсыз) дерегі бойынша кінәлі тұлғаларға айыппұлдан бастап, бас бостандығын шектеу немесе айыру жазасына дейінгі жауапкершілік қарастырылған. Ал егер бұл әрекет қайталанса немесе ауырлататын мән-жайлармен жасалса, жаза қатаңдатылуы мүмкін.

Қазіргі таңда тергеу амалдары жалғасуда.

Оқи отырыңыз:

• Қазақстанда заңсыз айналымнан 12 тоннадан астам алтын тәркіленді
• Шымкент — Астана рейсінде 7,6 миллион теңге ұрлаған шетелдіктер ұсталды
• Сайлауда жалған ақпарат таратқандар жазаланады