Еліміздегі ҰБТ-дан шекті балл жинаған талапкерлер күмән туғызды

ҰБТ-дан 140 балл жинаған талапкерлер көбейіп кетіп, көпшілік бұндай «білімге»  күмәнмен қарай бастады, тексеріс жүргізілсін деп жатқандар да бар. Дәл осындай пікірді бұрынғы білім министрі, депутат Асхат Аймағамбетов те айтқан болатын. Ұлттық тестілеу орталығы осы жағдайға қатысты пікір білдірді, деп хабарлайды Orda.kz.       

Тіпті соңғы уақытта ең жоғары балл жинаған түлектердің көбейіп кеткені мәжілісмендерді де  алаңдатқан. Айта кетейік, кейбір орталықтар жоғары нәтиже көрсеткендерге пәтер, көлік немесе миллиондаған сыйақыға уәде берді. Сонымен қатар, осындай орталықтарда дайындалған оқушылардың ҰБТ-дан 140 балл жинады деген ақпарат жиі тарауда.

Алайда тестілеу орталығының дерегінше, ел бойынша әзірге ең жоғары нәтижені тек бір ғана түлек ресми түрде көрсеткен.

Сонымен қатар, мәжілісмендер соңғы жылдары ең жоғары балл жинайтындардың тым көбейіп бара жатқанына назар аударып, академиялық адалдық мәселесі өзекті болып отырғанын айтады.

«Мені біраз алаңдататыны – ең жоғары балл жинайтындар өте көп сияқты көрінеді. Мүмкін олай емес шығар, мен нақты зерттеген жоқпын. Бұрын шекті балл алған әрбір талапкер бойынша міндетті түрде қосымша талдау жүргізетінбіз. Мұндай тексеріс қайта жасалады деп үміттенемін, өйткені академиялық адалдықты қамтамасыз ету өте маңызды», – деген болатын бұған дейін депутат Асхат Аймағамбетов. 

Ұлттық тестілеу орталығының түсіндіруінше, 140 балл жинағандарды арнайы бөлек тексеру жүргізілмейді, себебі барлық талапкерлер еш ерекшеліксіз бақылаудан өтеді. Кіру кезінде металл іздегіштер қолданылады, аудиторияда түлектердің барлық әрекетін тіркейтін бейнекамералар орнатылған.

ҰБТ тапсыру барысындағы бейнежазбалар бірнеше ай бойы тестілеу орталығы серверлерінде сақталады. Сонымен қатар, қызметкерлер 31 қазанға дейін оларды қайта қарап, ықтимал заңбұзушылықтарды анықтайды.

«Барлық талапкерлер тексеріледі. Біз 140 балл немесе 130 балл деп бөлмейміз, ҰБТ тапсырғандардың бәрі бақылаудан өтеді. ҰБТ- ға дайындайтын орталықтардың Ұлттық тестілеу орталығының тест базасына қол жеткізу мүмкіндігі жоқ. Тест тапсырмаларын әзірлеуге тартылған барлық мамандар бізбен құпиялылық туралы келісімге қол қояды», – деді Ұлттық тестілеу орталығы директорының орынбасары Наужан Дидарбекова. 

Еске салайық, бұған дейін Асхат Аймағамбетов түлектер кеші «даңғойлық жәрмеңкесіне» айналғанын айтқан еді. Ол сол кезде де оқу-ағарту министрлігінің мектеп бітіру кештерін мейрамханаларда, кафелерде және басқа да коммерциялық орындарда өткізуге тыйым салу туралы ұстанымына пікір білдірді.

Оқи отырыңыз:

• Қазақстанда негізгі ҰБТ-2026 басталды
• Қандай мамандар сұраныста: Биылғы жылға арналған гранттар бөлінісі
• Негізгі тестілеуден бір апта өтпей жатып 86 талапкердің ҰБТ нәтижесі жойылды