Түркияда мектептерге жасалған шабуылдардан кейін мұғалімдер наразылыққа шықты

Шанлыурфа мен Кахраманмараш қалаларындағы мектептерге жасалған қарулы шабуылдардан кейін елдің әртүрлі аймақтарынан келген мұғалімдер Анкараға жиналды. Олар наразылық акциясын өткізіп, білім министрін қызметінен кетуді талап етті, деп хабарлайды Orda.kz оппозициялық Halk TV телеарнасына сілтеп. 

Наразылық білдірушілер Түркия астанасындағы білім министрлігі ғимаратына қарай беттеген. Олар қолдарына «Юсуф Текин (білім министрі) – мұғалімдердің жауы, отставкаға кет!», «Оқушылар мектепте қаза болғанда қайда болдыңдар?», «Зорлық-зомбылыққа қарсы иық тірестірейік» деген плакаттар ұстаған. 

Жергілікті БАҚ-тың мәліметінше, полиция министрлік ғимаратына апаратын жолға тосқауылдар орнатып, наразы мұғалімдерді өткізбеген. Осындай акциялар Стамбұлда  да ұйымдастырылған.

Айта кетейік, кеше ғана Түркияның Кахраманмараш қаласындағы мектепте қару ұстаған оқушы 4 адамды жайратып салды. Қаза тапқандардың бірі – мұғалім, қалған үшеуі – оқушылар. Сондай-ақ 20 адамның жараланғаны айтылды.

Оқи отырыңыз:

• «Құрылыс жұмысын жасатқан»: Оқушыны өзін-өзі өлтіруге дейін жеткізген 3 адам сотталды
• АҚШ әскери-теңіз күштері Ормуз бұғазындағы миналарды іздеуге кірісті