АҚШ әскери-теңіз күштері Ормуз бұғазындағы миналарды іздеуге кірісті

АҚШ-тың әскери-теңіз күштері Ормуз бұғазындағы миналарды іздеу миссиясын бастады, деп хабарлайды  Orda.kz Politico сайтына сілтеп.

«АҚШ ӘТК алдында Ормуз бұғазында жаңа әрі аса маңызды міндет тұр: ирандық теңіз миналарының барлығын тауып, олар әлемдік экономиканы одан әрі үлкен дағдарысқа ұрындырмай тұрып жою» деп жазды басылым.

Ирандық «мыңдаған миналар қоры таусылды» деген мәлімдемелерге қарамастан, ол толық жойылмаған және америкалық барлау деректеріне сәйкес, миналардың бір бөлігі теңізде орналасқан.

Қазірдің өзінде өңірде оннан астам америкалық әскери кеме бар, тағы да көп кемелер блокаданы қамтамасыз ету үшін сол жаққа бағытталуда. Бұл кемелер миналарды анықтап қана қоймай, мина жойғыш кемелер қызметін де атқарады.

Бұғазды минадан тазарту жұмысының қиындығы — бір күнде тазартылған аумақты ирандық шағын қайықтар оңай қайтадан миналап тастауы мүмкін. Америкалық әскерилердің айтуынша, бұл үдерісті өте күрделі әрі үздіксіз етеді.

Сондай-ақ Иран бірнеше түрлі миналарды орналастыра алатыны айтылған. Олардың ішінде теңіз түбіне орнатылып, үстінен кеме өткен кезде жарылатын түрлері бар. Кейбірі теңіз түбіне шынжырмен бекітіледі, ал минаның өзі су бетіне жақын қалқып тұрады, енді біреулері ағыс бойымен қозғалады.

«Әзірге АҚШ ӘТК бірде-бір ирандық минаны анықтаған жоқ. Алайда коммерциялық операторлар сақтық танытып отырғандықтан, су жолдарындағы кеме қозғалысы айтарлықтай азайған. Бұл америкалық әскерилер үшін қауіпсіз әрі нақты бағыттарды көрсету қажеттілігін одан әрі арттырады» деп жазылған мақалада. 

Оқи отырыңыз:

• Иран СІМ: Ормуз бұғазына мина қойып жатқан жоқпыз 
• Иранның Ормуз бұғазын аша алмау «себебі» белгілі болды
• Иран АҚШ-тың қарулы соғысына «логистикалық соғыспен» жауап беріп, стратегиялық тығырыққа тіреді