Трамп пен Зеленский Ақ үйде жабық кездесу өткізді

Вашингтонда Дональд Трамп пен Владимир Зеленскийдің кездесуі өтті. Келіссөздер бұқаралық ақпарат құралдары өкілдерінсіз өтті, деп хабарлайды Orda.kz.

Кездесу аяқталғаннан кейін тараптар бірлескен мәлімдеме жасамады және баспасөз конференциясын өткізген жоқ. Reuters агенттігінің мәліметінше, Зеленский Ақ үйде бір сағаттан сәл артық уақыт болып, кейін резиденциядан кеткен.

Кейін Украина президенті бұл кездесу туралы өзінің Telegram-арнасында жазды. Оның айтуынша, тараптар Patriot зениттік-зымыран кешендеріне арналған тосқауылдаушы зымырандарды өндіруге лицензия беру мүмкіндігін, сондай-ақ Украинаға көмектесуі мүмкін «бірқатар басқа идеяларды» талқылаған.

Сонымен қатар, Трамп пен Зеленский қақтығысты дипломатиялық жолмен реттеу мәселелерін де қозғады.

«Біздің командалар алдағы өзара іс-қимылдың егжей-тегжейін келіседі» деп жазды Зеленский. 

Ақ үйдегі келіссөздерден кейін Украина президенті Капитолийге аттанды. Онда ол АҚШ-тың барлық 100 сенаторымен кездесуі мүмкін. Ал Дональд Трамптың кестесінде кейін Израиль премьер-министрі Биньямин Нетаньяхумен келіссөздер жоспарланған.

Бұған дейін Трамп пен Зеленский Анкарада өткен НАТО саммитінде кездескен болатын. Сол кезде АҚШ президенті Вашингтон Украинаға Patriot кешендеріне арналған зымырандарды өндіруге лицензия беруі мүмкін екенін айтқан.

Осы уақытта Қасым-Жомарт Тоқаев Омбыда Владимир Путинмен өткен келіссөздерде Ресей мен Украина арасындағы қақтығысқа қатысты пікір білдірді. Ол бейбіт реттеудің мүмкін жолдарының бірі ретінде Стамбұл формуласына қайта оралуды ұсынды.

Оқи отырыңыз:

• Зеленский: Біз Трамппен кездесу туралы келістік
• Зеленский Путинмен тікелей келіссөздерге дайын екенін айтты
• Зеленский: Украина Еуроодақтың «қауымдастырылған мүшесі» болмайды