Трамп: Иран Ормуздан өткен АҚШ кемелеріне тиіссе — жер бетінен жойылады

Дональд Трамп Fox News арнасына берген сұхбатында, егер Ислам Республикасы Ормуз бұғазы арқылы кемелерді өткізіп жатқан америкалық кемелерге шабуыл жасаса, Иран «жер бетінен жойылады» деп мәлімдеді, деп хабарлайды Orda.kz.      

«Бізде бұрынғыдан әлдеқайда көп қару-жарақ және сапасы жоғары оқ-дәрілер бар. Біздің жабдықтарымыз ең үздік. Бүкіл әлем бойынша ресурстарымыз бар. Бүкіл әлемде базаларымыз бар. Олардың бәрі қажетті құрал-жабдықпен қамтамасыз етілген. Біз мұның бәрін пайдалана аламыз және қажет болса, міндетті түрде қолданамыз», — деп атап өтті АҚШ президенті. 

АҚШ 4 мамырда Ирандағы соғыс басталғаннан бері Ормуз бұғазында тұрып қалған кемелерді босату миссиясына кіріскен болатын. Кеше президент Дональд Трамп «Бостандық жобасы» операциясының басталғанын жариялады.

Ол Ормуздағы кептелісті азайту туралы өтінішпен АҚШ-қа Иранмен қақтығысқа қатыспайтын, «бейтарап және жазықсыз бақылаушы» болған бірқатар ел жүгінгенін хабарлады.

АҚШ шенеуніктерінің түсіндіруінше, «Бостандық жобасы» коммерциялық кемелерді сүйемелдеу үшін әскери кемелерді міндетті түрде пайдалануды көздемейді. Бірақ Трамптың төңірегіндегі адамдар бұл бастама соғыстың қайта басталуына әкелуі мүмкін деп санайды. Иран да оны оқ атуды тоқтату режимін тікелей бұзу деп бағалайды.

Кеше «Хатам әл-Анбия» орталық штабының қолбасшысы Әли Абдоллахи  кез келген шетелдік қарулы күш, әсіресе америкалық әскер, Ормуз бұғазына жақындауға немесе оған кіруге әрекет жасаса, шабуылға ұшырайды, деп мәлімдеген еді.

Оқи отырыңыз: 

• Иран Ормуз бұғазына жақындаған шетелдік қарулы күштерді аямайтынын ескертті
• Ормуз бұғазында тұрып қалған кемелерді шығару операциясы басталды
• Иран АҚШ-қа 14 тармақтан тұратын бейбіт жоспар жолдады