Трамп Гренландия мен Арктикаға байланысты Еуропаға сауда тарифтерін енгіземін деп қоқан-лоқы жасады

 АҚШ президенті Дональд Трамп Гренландия төңірегіндегі жағдай мен Арктика аймағындағы қауіпсіздік мәселелеріне байланысты бірқатар еуропалық елдерге сауда тарифтерін енгізу ниеті бар екенін мәлімдеді, деп хабарлайды Orda.kz.      

Оның айтуынша, Америка Құрама Штаттары ондаған жылдар бойы Данияны, Еуроодақ елдерін және одақтастарын сауда шектеулерін енгізбей, іс жүзінде субсидиялап келген, алайда енді бұл ұстанымды өзгерту қажет деп санайды. Трамптың пікірінше, Қытай мен Ресей Гренландияға қызығушылығын арттырып отыр, ал Дания аралдың қауіпсіздігін қамтамасыз етуге қауқарсыз.

АҚШ президентінің мәлімдемесіне сәйкес, 2026 жылғы 1 ақпаннан бастап Дания, Норвегия, Швеция, Франция, Германия, Ұлыбритания, Нидерланд және Финляндиядан АҚШ-қа жеткізілетін барлық тауарларға 10 пайыздық тариф салынады. Ал 2026 жылғы 1 маусымнан бастап бұл мөлшерлеме 25 пайызға дейін өсіп, «Гренландияны толық сатып алу» туралы келісім жасалғанға дейін күшінде болады делінген.

«Бұл ойында тек Америка Құрама Штаттары ғана ойнай алады және оны табысты түрде жүргізе алады» деп жазды Трамп.  

Оның айтуынша, АҚШ пен бүкіл әлемнің қауіпсіздігі қауіп-қатерге ұшырап отыр. 

Сондай-ақ ол Вашингтонның Даниямен және өзге елдермен келіссөздер жүргізуге дайын екенін мәлімдеп, Гренландияның жаһандық қауіпсіздік пен АҚШ-тың қорғаныс жүйелері үшін аса маңызды мәнге ие екенін атап өтті.

The Wall Street Journal мен The New York Times дереккөздерге сілтеме жасап жазғандай, Ақ үй Гренландияны басып алуды емес, Даниядан сатып алу жолдарын іздеуде.

Оқи отырыңыз:

• НАТО-ның аралдағы тұрақты миссиясын барлайтын әскери топ Гренландияға келді
• Алматының тынысы тарылды: энергетика министрі ЖЭО-3-тің жұмысын сынады
• Оспадарсыз әлеуметтік сақтандыру: қайтыс болғандарды қабылдауға жазып, ер адамдарды әйелдерге арналған скринингтен өткізген