Алматының тынысы тарылды: энергетика министрі ЖЭО-3-тің жұмысын сынады

Энергетика министрі Алматыдағы ЖЭО-3-ті жаңғырту қарқынын сынға алып, жұмыстарды жеделдетуді талап етті, деп хабарлайды Orda.kz.       

Энергетика министрі Ерлан Ақкенженов Алматыға жасаған жұмыс сапары барысында қалалық энергетика торабын газға көшіру барысын тексерді. Ол ЖЭО-3-тегі жоба бойынша жұмыстың кешеуілдеуі жол берілмейтін жағдай екенін айтып, мердігерлерден ахуалды дереу түзетуді талап етті.

«Алматы қаласы тұншығып отыр, біз станцияларды газға көшірудеміз — бұл Президенттің тапсырмасы әрі халыққа берген уәдеміз. Бізде қателесуге ешқандай құқық жоқ!» — деп атап өтті Ерлан Ақкенженов. 

ЖЭО-2-де жұмыстар бекітілген кестеге сай жүргізіліп жатыр, жаңа қазандықтар сәтті сынақтан өткен.

Ал ЖЭО-3-те жұмыс кестесінен қалып қойған, министр мұны мердігердің жұмысты әлсіз ұйымдастыруының салдары деп бағалады. Ол ресурстарды дереу жұмылдыруды, қажет болған жағдайда жұмысшылар санын арттыруды талап етіп, орындаушыларға жеке жауапкершілік жүктеді. Бақылауды күшейту мақсатында нысанда нақты уақыт режимінде бейнебақылау орнатылатын болды.

«Жұмыс қарқынын төмендетуге болмайды. Қажет болса — жұмысшы санын арттырыңыздар, бірақ артта қалушылыққа жол берілмейді. Мерзімдердің бұзылуына жол жоқ. Құрылыс барысын нақты уақыт режимінде бақылау үшін нысанға бейнебақылау орнатамыз. Міндет айқын — 31 желтоқсанға дейін станциялар толыққанды жұмыс істеуі керек!» — деп мәлімдеді министр.

Еске салсақ, былтыр маусым айында Қостанай облысындағы Арқалық қаласының жылу желілеріндегі жөндеу жұмыстарын аяқтау үшін үкімет резервінен шамамен 250 миллион теңге бөлінді. 

Тақырып аясында ұсынамыз:

• Сарапшы: Қазақстанда АЭС салу екі есе қымбатқа түсуі мүмкін
• Мердігер анықталды: Қазақстанда АЭС-ті «Росатом» салады
• Риддердегі ЖЭО жөндеуге Т1,7 млрд жуық қаржы бөлінді
• Ресейліктер уәде еткен үш ЖЭО құрылысы кейінге қалды