Трамп: АҚШ пен Иран келіссөздерді бүгін қайта бастайды

АҚШ президенті Дональд Трамп Иранмен келіссөздер бүгін қайта жалғасатынын мәлімдеді. Оның айтуынша, бұған дейін жоспарланған «ауқымды шабуыл» соңғы сәтте тоқтатылған, деп хабарлайды Orda.kz.       

Air Force One ұшағында журналистерге сөйлеген Трамп шабуылды тоқтатуды АҚШ-тың одақтастары — Сауд Арабиясы, Біріккен Араб Әмірліктері, Катар және Иранның өзі сұрағанын айтты.

«Біз шабуыл жасауға толық дайын болдық. Бірақ одақтастарымыз бәрін тоқтатуды өтінген соң, «келісімге мүмкіндік бар ма, көрейік» деп шештік», — деді Трамп. 

Оның сөзінше, алдымен Ормуз бұғазы бойынша келісім, кейін Иранның ядролық бағдарламасы, яғни елді ядролық қарудан толық бас тартуға бағытталған келісім жасалуы мүмкін.

Сонымен қатар Сауд Арабиясының тақ мұрагері Мұхаммед бен Салман Трамппен телефон арқылы сөйлесіп, аймақтағы соғысты ушықтырмауға шақырған. CNN дереккөздерінің мәліметінше, бұл әңгімеде ханзада АҚШ-тың Иранға соққы беру жоспарына алаңдаушылық білдірген.

Ал Трамп ықтимал соққылардың Иранның энергетикалық инфрақұрылымына бағытталған-болмағаны туралы сұраққа жауап беруден бас тартты.

Оқи отырыңыз:

• Иран СІМ: Соғыс пен бейбітшілік уақытын АҚШ белгілемейді
• АҚШ-та іздеуде болған әйгілі картель басшысы Мексикада ұсталды