Иран СІМ: Соғыс пен бейбітшілік уақытын АҚШ белгілемейді

Трампқа жауап ретінде Тегеран соғыс пен бейбітшілік уақытын АҚШ-қа басқартып қоюға жол бермейтінін мәлімдеді, деп хабарлайды Orda.kz Euronews-ке сілтеп.

Иран Сыртқы істер министрлігінің ресми өкілі Эсмаил Багаи Тегеран АҚШ-тың соғысты қашан бастау және бейбітшілікті қашан жариялау мәселесін шешуіне жол бермейтінін айтты.

«Біз АҚШ-тың соғыс пен бейбітшілік уақытын анықтауына мүмкіндік бермейміз», – деді Багаи апта сайынғы болатын брифингте. 

Оның сөзінше, болашақ келіссөздерге қатысты кез келген шешім тек Иранның ұлттық мүдделеріне негізделеді. Сондай-ақ Тегеран «қажет болғанша» өзін қорғауды жалғастырады.

Австриялық ORF телеарнасына берген сұхбатында Багаи Тегеран мен Вашингтонның хабар алмасуды жалғастырып жатқанын растады. Алайда ол АҚШ әскери әрекеттері мазмұнды келіссөздер жүргізу мүмкіндігін бұзғанын айтып, қазіргі басты басымдық Иранның егемендігі мен аумақтық тұтастығын қорғау екенін атап өтті.

Бұған дейін АҚШ президенті Дональд Трамп журналистерге Иран «делдалдар арқылы да, тікелей де» келіссөздер сұрағанын мәлімдеген еді. Оның айтуынша, Тегеран әскери қысымның әсерінен диалогқа дайын.

«Біз Иранмен терең келіссөздер жүргізіп жатырмыз. Егер олар сәтсіз аяқталса, кең ауқымды әскери операцияға қайта ораламыз», – деді Ақ үй басшысы. 

Трамп делдалдардың дипломатияға тағы бір мүмкіндік беру туралы өтінішіне оң жауап бергенін, бірақ келіссөздердің шексіз созылуына жол бермейтінін айтты.

1 тамыз, сенбі күні Трамп Иранмен бейбіт келісімге келу мүмкіндігіне байланысты жоспарланған ірі әскери соққыны тоқтатқанын мәлімдеді. Оның сөзінше, келісім Ормуз бұғазын толық әрі дереу ашуды, сондай-ақ Иранның ядролық бағдарламадан бас тартуын қамтуы мүмкін. Алайда дипломатиялық әрекеттер қайта жанданғанымен, Ормуз бұғазы төңірегіндегі дағдарыс әлі шешілмеген.

Багаи Ормуз бұғазын басқару мәселесі бойынша Оманмен келіссөздер жалғасып жатқанын айтты. Оның айтуынша, бұл келіссөздер тек екіжақты сипатта өтіп жатыр және бұның АҚШ-қа еш қатысы жоқ.

Иран мәжілісі төрағасының орынбасары Хаджи Бабаи бұғазға қатысты Оманмен жасалатын кез келген келісім Иранның егемендігіне қайшы келмеуі тиіс екенін мәлімдеді. Сондай-ақ ол бұл мәселені талқылауға Вашингтон қатыспауы керек екенін атап өтті.

Оның айтуынша, Иран Ормуз бұғазы бойынша өз ұстанымынан бас тартпайды, ал бұл мәселеге қатысты түпкілікті шешімді ел басшылығы мен халқы қабылдайды. Иран бұғазға қатысты «егемен құқықтарға» ие екенін айтып, кемелердің өту бағыттарын өзі анықтауға құқылы екенін мәлімдейді.

Ал АҚШ, Парсы шығанағы елдері және халықаралық қауымдастықтың басым бөлігі бұл талаптарды БҰҰ-ның Теңіз құқығы туралы конвенциясына сілтеме жасап мойындамайды. Тегеран бұл құжатқа қол қойғанымен, оны ратификацияламаған.

Оқи отырыңыз:

• Иран: АҚШ-қа 20 млрд доллардан астам шығын келтірдік
• АҚШ пен Сауд Арабиясы Ирактағы Иран қолдайтын террористік нысандарға соққы берді
• АҚШ Иран уранын қолға түсіру үшін күрделі операция дайындап жатыр – БАҚ