АҚШ-та іздеуде болған әйгілі картель басшысы Мексикада ұсталды

Мексиканың құқық қорғау органдары «Лос-Рейес» картелінің жетекшісі Альфонсо Фернандес Магальонды, яғни Пончо лақап атымен танымал тұлғаны ұстады, деп хабарлайды Orda.kz.        

Бұл туралы елдің қауіпсіздік министрі Омар Гарсия Арфуш X әлеуметтік желісінде хабарлады. Оның мәліметінше, Мексиканың құрлықтағы әскерлері жүргізген операция нәтижесінде «Лос-Рейес» картелінің жетекшісі Альфонсо «Н» қолға түскен.

Бұған дейін АҚШ билігі оны ұстауға көмектесетін ақпарат үшін 5 миллион долларға дейін сыйақы тағайындаған болатын.

Roya News мәліметінше, Магальон АҚШ-та ең көп іздеуде жүрген қылмыскерлердің қатарына кіреді. Оған адам ұрлау, есірткі өндіру және тарату айыптары тағылған. Кей деректерге сәйкес, ол 2025 және 2026 жылдары мексикалық әскери күштерге қарсы жасалған ұшқышсыз аппараттар арқылы шабуылдарға да қатысы бар.

Картель басшысы ұсталғаннан кейін «Лос-Рейес» мүшелері Мичоакан штатында бірнеше жолды жауып, баррикадалар орнатып, ондаған автокөлікті өртеп жіберген. Өңірде қоғамдық тәртіп толық қалпына келгенге дейін әскери күштер күшейтілді.

Milenio газетінің жазуынша, «Лос-Рейес» картелі «Картелес унидос» атты мексикалық топтың құрамына кіреді. Бұл ұйым «Ла Ресистенсия» атауымен де белгілі.

Оқи отырыңыз:

• Қазақстанда жаңа теміржол желісі салынады
• Енді шенеуніктермен әңгімеңіз жазылады: Азаматтарды қабылдау тәртібі өзгереді