Тоқаев Құрбан айт мерекесімен құттықтады

Қасым-Жомарт Тоқаев қазақстандықтарды Құрбан айт мерекесімен құттықтап, бұл күннің халқымыздың рухани өмірінде ерекше орын алатынын айтты, деп хабарлайды Orda.kz.

Мемлекет басшысы бұл мереке мейірімге, жанашырлыққа, адамгершілікке, өзара құрметке, сенім мен ынтымаққа үндейтінін атап өтті.

«Құрбан айттың қасиетті күндері бір-бірімізге қолдау көрсетудің, үлкенді сыйлаудың және ел игілігі үшін ортақ жауапкершіліктің маңызын еске салады. Бұл — әділеттілікке, ізгілікке, рухани тазалыққа негізделген ислам құндылықтарын терең түсінетін уақыт» деп жазылған құттықтауда.

Президенттің айтуынша, ислам және өзге де дәстүрлі діндердің құндылықтары халықтың рухани дамуына, ұрпақ сабақтастығына, қоғамдағы бірлік пен келісімді нығайтуға негіз болады.

Сонымен қатар, ол ел үшін Тәуелсіздік пен егемендіктен биік құндылық жоқ екенін айтып, Конституцияны халықтың болмысы мен бірегейлігінің өзегі деп атады. Осыған байланысты ұлттық бірлікті күшейту, этносаралық және конфессияаралық татулықты сақтау мемлекеттік саясаттың басты бағыты екенін жеткізді. Сондай-ақ, мемлекет басшысы халықтың басты күші — бірлік пен елге жанашыр патриотизм екенін айтып, барша қазақстандыққа денсаулық, бақыт пен амандық тіледі.

Оқи отырыңыз:

Құрбан айт намазының уақыты жарияланды

Айт қарсаңында құрбандық малы айтарлықтай қымбаттады

Құрбандыққа мал таңдау: Онлайн құрбандық қалай шаламыз?