Тоқаев дипломатиялық форумға қатысу үшін Анталиядағы NEST конгресс орталығына келді

Мемлекет басшысы Қасым-Жомарт Тоқаев Анталия дипломатиялық форумының панельдік сессиясына қатысу үшін NEST конгресс орталығына келді, деп хабарлайды Orda.kz Ақордаға сілтеп.

«Mapping Tomorrow, Managing Uncertainties» тақырыбына арналған көшбасшылар пікірталасына Солтүстік Македония президенті Гордана Силяновска-Давкова және Грузия премьер-министрі Ираклий Кобахидзе қатысады.

Модераторы – Түркия Ұлы Ұлттық жиналысының мүшесі, бұрынғы сыртқы істер министрі Мевлют Чавушоғлу.

Сонымен қатар Ақорда алдағы күндердің іс-шараларына қатысты аңдатпа жариялады.

20-23 сәуір күндері Қасым-Жомарт Тоқаевтың шақыруымен Моңғолия президенті Ухнаагийн Хурэлсүх Қазақстанға мемлекеттік сапармен келеді. Жоғары деңгейдегі келіссөздер барысында екі елдің саяси, сауда-экономикалық және мәдени-гуманитарлық ынтымақтастығын нығайту перспективасы талқыланады. 

22-24 сәуірде Астанада Өңірлік экологиялық саммит өтеді. 

БҰҰ аясында құрылған жаңа диалог алаңының мақсаты – Орталық Азияның орнықты дамуына ортақ көзқарас қалыптастыру, климаттық және экологиялық сын-қатерлерді еңсерудің бірлескен шешімін іздеу. Жиынға бірқатар мемлекет және үкімет басшылары, сондай-ақ халықаралық ұйымдардың жетекшілері қатысады.

22 сәуір күні президент Қасым-Жомарт Тоқаевтың төрағалығымен Халықаралық Аралды құтқару қорының құрылтайшы мемлекеттер басшыларының кеңесі өтеді.

Оқи отырыңыз:

• Тоқаев Анталиядағы дипломатиялық форумға қатысады
• Қазақстанда цифрландыру мен AI жылы: Тоқаевтың мәлімдемесі
• Ерлан Қошанов Парламентаралық Одақтың 152-ші Ассамблеясында сөз сөйледі