Тоқаев «Белгісіз сарбаз» зиратына гүл шоқтарын қою рәсіміне қатысты

Мемлекет басшысы «Белгісіз жауынгер» зиратына гүл шоқтарын қою рәсіміне қатысты, деп хабарлайды Orda.kz Ақордаға сілтеме жасай отырып.

Жарияланған бейнеде Президент Қасым-Жомарт Тоқаев жеңіс парадына шақырылған басқа елдердің көшбасшыларымен бірге «Белгісіз сарбаз»  зиратына гүл шоқтарын қойды.

Белгісіз жауынгер зираты - Мәскеудегі мемориалдық кешен, Кремль қабырғасының жанындағы Александр бағында орналасқан. Ол екінші дүниежүзілік соғыста қаза тапқан, есімдері белгісіз болған кеңес сарбаздарын еске алуға арналған ескерткіш. 1967 жылы ашылған мемориалға Мәңгілік алау, № 1 сағаттық пост, сондай-ақ Батыр қалалар аллеясы кіреді.

 Бұған дейін Президент Қасым-Жомарт Тоқаев Мәскеудегі Қызыл алаңдағы шеруге қатысқан Қазақстан Қарулы Күштерінің әскери қызметшілерін қарсы алды. 

 Парадқа Қазақстан Республикасын Кеңес Одағының Батыры генерал-майор Иван Панфилов атындағы десанттық-шабуылдау әскерлері 37-бригадасының әскери қызметшілері қатысты.

Мемлекет басшысы 8 мамырда Ресей басшысы Владимир Путиннің шақыруымен жеңістің 80 жылдығына арналған іс-шараларға қатысу үшін Ресейге барды.

Премьер-Министр Олжас Бектенов Кеңес Одағының екі мәрте батыры, аты аңызға айналған шабуылшы ұшқыш  Талғат Бегелдиновтің ескерткішіне гүл шоқтарын қойды.