Тоқаев АҚШ президентінің арнайы өкілі Серджио Горды қабылдады

Мемлекет басшысы Қасым-Жомарт Тоқаев АҚШ президентінің Оңтүстік және Орталық Азия бойынша арнайы өкілі Серджио Горды қабылдады, деп хабарлайды Orda.kz.

Кездесу барысында президент қазақ-америкалық ынтымақтастықтың жоғары деңгейін атап өтіп, Америка Құрама Штаттарымен кеңейтілген стратегиялық серіктестікті одан әрі нығайтуға дайын екенін жеткізді.

«Біз өзекті мәселелерді кеңінен талқылауға мүмкіндік туғанын оң бағалаймыз. Әсіресе, аса маңызды минералдар бойынша C5+1 диалогына қатысуыңызды құптаймыз. Бұл Құрама Штаттардың Қазақстанмен және бүкіл Орталық Азиямен ынтымақтастыққа стратегиялық тұрғыдан мән беретінін көрсетеді. Сондай-ақ Сіздің екіжақты байланыстарды дамытуға қосқан үлесіңізді атап өткім келеді», – деді Қасым-Жомарт Тоқаев.

Президенттің айтуынша, Қазақстан АҚШ-пен кеңейтілген стратегиялық серіктестікті одан әрі дамытуға мүдделі.

Сонымен қатар Мемлекет басшысы Серджио Гор арқылы АҚШ Президенті Дональд Трампқа жылы лебізін жолдап, жыл соңына дейін кездесуге үміт білдірді.

«Орайлы сәтті пайдалана отырып, Сіз арқылы АҚШ президенті Дональд Трампқа ыстық ықыласым мен ізгі тілегімді жолдаймын. Жыл соңына қарай біз кездесеміз деп ойлаймын. Сонымен бірге Майамиде өтетін G20 саммитіне қатысуға шақырғаны үшін ризашылығымды білдіремін», деді Президент

Кездесу барысында тараптар Қазақстан мен АҚШ арасындағы стратегиялық әріптестікті дамыту, өңірлік қауіпсіздік және экономикалық ынтымақтастық мәселелерін талқылады.

Оқи отырыңыз:

• Қарасай ауданы сусыз қалды: Тұрғындар жылда қайталанатын мәселе әбден мезі қылғанын айтты
• Сүйіп, порно көрсетті: 15 жастағы қыз атасы жасаған анайы қылықтарды айтып берді