Қарасай ауданы сусыз қалды: Тұрғындар жылда қайталанатын мәселе әбден мезі қылғанын айтты

Алматы облысы Қарасай ауданында 10-нан астам елді мекен сусыз отыр. Тұрғындардың сөзінше,  (BEYAZH TRANS) «Биаш Транс» компаниясының миллиард теңгеге жуық қарызы, тозығы жеткен инфрақұрылым және жылдар бойы шешілмеген мәселелер бірнеше ауылды сусыз қалдырған, деп хабарлайды Orda.kz. 

Қарасай ауданына қарасты Алмалыбақ ауылының тұрғындары кеше әкімдік өкілдеріне ауыз су мәселесіне байланысты наразылық білдірді. Олардың айтуынша, ауылда бесінші күн қатарынан су жоқ. Тұрғындар бұл мәселе тек Алмалыбаққа ғана емес, Қарасай ауданында 10-нан астам елді мекенге ортақ екенін айтады.

Ауыл тұрғындарының сөзінше, Қарасай ауданында су тарату қызметін атқарған «Биаш Транс»компаниясы жылдар бойы су мұнаралары мен құбыр желілеріне қажетті жөндеу жұмыстарын жүргізбеген. Соның салдарынан апаттар жиілеп, су сорғылары үнемі істен шығып отырған.

«Бұл бір күннің немесе бір жылдың мәселесі емес. Соңғы үш жыл бойы тұрғындар үнемі шағым жазып, түрлі мемлекеттік органдарға жүгініп келеді. Тіпті президентке де үндеу жолдауға мәжбүр болдық. Жағдай өткен жылдың көктемінен бастап тіпті қиындап кетті. Жазда ауылымызда өрт болып, тұрғын үйлер өртенген кезде де су болмады. Себебі кезекті рет су жүйесіндегі сорғы істен шыққан еді», – дейді ауыл тұрғыны Олеся Тимченко.

Тұрғындардың айтуынша, кейін Қарасай ауданы әкімдігі мен компания арасында сот дауы басталған. Бір жылдан астам уақытқа созылған сот процесінің нәтижесінде компаниямен жасалған келісімшарт жарамсыз деп танылған. Алайда бұл мәселені шешпеген. Тұрғындар «Биаш Транс» электр энергиясын жеткізетін «Алатау Жарық Компаниясы» АҚ алдында ірі көлемде қарыз жинағанын айтты.

«Біздің ауылдардағы су ұңғымалары электр қуатымен жұмыс істейтін сорғылар арқылы іске қосылады. Сондықтан электр энергиясы болмаса, су да болмайды. Бүгін де Ұмтыл, Райымбек, Іргелі ауылдық округтерінің және жалпы Қарасай ауданындағы көптеген елді мекендердің тұрғындары осы мәселенің зардабын тартып отыр», – дейді Олеся Тимченко.

Тұрғындардың сөзінше, кеше аудан әкімінің орынбасары Ақылбек Беқсұлтан халықпен кездесуде компанияның «Алатау Жарық Компаниясы» алдындағы қарызы шамамен 1 миллиард теңгеге жеткенін мәлімдеген. Олардың айтуынша, дәл осы қарыздың салдарынан су ұңғымаларының жұмысы тоқтап, бірнеше ауыл бірнеше күннен бері сусыз қалған.

Тұрғындар ауыз су мен тұрмыстық су тапшылығынан зардап шегіп отырғандарын айтып, мәселені шұғыл шешуді талап етті. Сонымен қатар, тұрғындардың айтуынша, сот шешімінен кейін су нысандары әкімдік балансына өткен. Яғни, бұған дейін «Биаш Транс» компаниясының қарамағында болған су ұңғымалары мен су жүйелері мемлекет меншігіне берілген. Алайда тұрғындардың пікірінше, жағдай әлі өзгермеген.

Кеше өткен кездесуге аудан әкімінің орынбасарынан бөлек, Ұмтыл ауылдық округінің әкімі мен оның орынбасары, аудандық тұрғын үй-коммуналдық шаруашылық бөлімінің басшысы және жаңа мердігер ұйым өкілдері қатысқан. Шенеуніктер мәселені нысандарды қабылдау-тапсыру рәсімдерінің аяқталмауымен түсіндірген.

«Қабылдау-тапсыру құжаттарын рәсімдеу үшін уақыт керек дейді. Бірақ бұл олардың заңдық мәселесі. Халыққа оның қандай қатысы бар? Біз су үшін төлем жасадық, енді су талап етеміз. Ал олар құжат рәсімдеп жүргенде, бес күннен бері халық сусыз отыр», – дейді тұрғындар.

Олардың айтуынша, билік тек тұрғындардың наразылығынан кейін ғана әрекет ете бастаған. Нақты осы жылғы cудың жыры 30 сәуірден бастап, мамыр бойы бір күн өшіп, бір күн су беріліп адамдардың берекесін кетірген.

«Кешегі жанжалдан кейін кешке бір су таситын көлік келді. Бүгін таңертең тағы бір су таситын көлік жіберілді. Бірақ бұл мәселені шешпейді де ауылдарға түгел жетпейді де. Ауыл тұрғындарына тұрақты су қажет», – дейді олар.

Бұдан бөлек, тұрғындар ауылдағы су құбыры желілерінің жағдайы өте нашар екенін айтады. Олардың мәліметінше, ішкі су жүйесінің тозу деңгейі шамамен 90 пайызға жеткен. Ескірген құбырлар жиі жарылып, апаттар тұрақты түрде қайталанып отырады.

«Құбырлардың жағдайы өте нашар. Оларды пайдалануға жарамсыз деуге болады. Ауыз су келетін су тарту нысанының жағдайы да өте ауыр. Қажетті жөндеу жұмыстары ұзақ уақыт бойы жүргізілмеген. Инфрақұрылым әбден тозған.  Егер су жүйесіне жақын арада күрделі жөндеу жүргізілмесе, мұндай жағдайдың алдағы уақытта да қайталанады», – дейді тұрғындар.

Orda.kz мәселеге қатысты Қарасай ауданының әкімшілігіне сұрау салдық, материал жарияланған сәтте жауап әлі келмеді. 

Оқи отырыңыз:

• Сүйіп, порно көрсетті: 15 жастағы қыз атасы жасаған анайы қылықтарды айтып берді
• Судья Айгүл Сайлыбаеваның туыстары кісі өлімінің жан түршігерлік жай-жапсарын айтты