Тоқаев 16 жасқа толмағандардың әлеуметтік желіге тіркелуіне тыйым салуды қолдады

Президент Қасым-Жомарт Тоқаев 16 жасқа толмаған балалардың әлеуметтік желілерге тіркелуіне заң арқылы тыйым салу ұсынысын қолдайтынын айтты, деп хабарлайды Orda.kz.

Мемлекет басшысы өскелең ұрпақтың қолайлы әрі қауіпсіз ортада өмір сүруіне жағдай жасау қажет екенін атап өтті.

«Жалпы, біз өскелең ұрпақтың қолайлы және, ең бастысы, қауіпсіз ортада өмір сүруі үшін барынша жағдай жасауымыз керек», – деді Тоқаев.

Оның айтуынша, Үкімет 16 жасқа толмаған балалардың әлеуметтік желіге тіркелуіне заң жүзінде тыйым салуды ұсынып отыр. Президент бұл мәселеге Тамыз конференциясында да арнайы тоқталғанын еске салды. Оның сөзінше, мұндай шара әлемнің көптеген елінде енгізіліп жатыр.

«Мен мұны қолдаймын. Осы жұмысқа баса назар аудару қажет деп санаймын. Бірақ тиісті заңды қабылдасақ, оны толығымен жүзеге асыру мәселесін ойлауымыз керек, себебі, қауқарсыз заң ешкімге қажет емес»,  деді мемлекет басшысы.

Сонымен қатар Тоқаев энергетика саласының технологиялық тұрақтылығын қамтамасыз етуге және баламалы энергия көздерін дамытуға мүмкіндік беретін заң жобаларын жедел қарастыру маңызды екенін айтты. Президент онлайн-платформалар мен масс-медиаға қатысты заңдарға да ерекше назар аударуға шақырды.

«Ақпарат кеңістігінде азаматтардың құқықтары мен заңды мүдделерін қорғау үшін қосымша шаралар қабылдау қажет», – деді Қасым-Жомарт Тоқаев.

Оқи отырыңыз: 

Тоқаев Құрылтайдың басты міндеттерін атады

Тоқаев: Қыркүйектің екінші жартысында Халық Кеңесі жасақталады