Тоқаев Құрылтайдың басты міндеттерін атады

Президент Қасым-Жомарт Тоқаев жаңа Конституция қабылданғаннан кейін Құрылтай алдында тұрған негізгі міндеттерді атады, деп хабарлайды Orda.kz.

Мемлекет басшысының айтуынша, еліміздің заңнамасына жаңа Конституция нормаларын ескере отырып, тиісті түзетулер енгізу қажет.

«БІРІНШІ. Жаңа Конституция нормаларын ескере отырып, еліміздің заңнамасына түзетулер енгізу қажет. Жаңа конституциялық жүйеге өту барысында бұрынғы Парламент негізгі билік институттарының қызметін қамтамасыз ететін бірқатар маңызды заңдарды қабылдады.
Енді Құрылтай әр салаға қатысты заңнаманы мұқият саралап, олардың Конституция қағидаттарына сай болуын қарауы керек»,  деді Тоқаев.

Президент Құрылтай заң шығару үдерісінің тұрақтылығы мен сапасын қамтамасыз етуі қажет екенін атап өтті.

«ЕКІНШІ. Құрылтай заң шығару үдерісінің тұрақтылығы мен сапасын қамтамасыз етуі керек.
Бұған дейін Сенат Мәжіліс қабылдаған заңдардың Конституцияға сәйкестігін, құқықтық тұрғыдан дұрыстығын, нормалардың өзара үйлесімділігін тексеріп отырды.
Бұл жұмысты жандандыру қажет»,  деді мемлекет басшысы.

Президент Қасым-Жомарт Тоқаев Құрылтай депутаттары алғашқы сессияда бірқатар маңызды заңды қабылдауы қажет екенін айтты.

Мемлекет басшысы жасанды интеллектіні орта білімге енгізу, цифрлық активтер индустриясын дамыту және Digital Qazaqstan стратегиясына қатысты жарлықтар шығарғанын атап өтті. Енді осы бағыттар бойынша қажетті заң жобаларын Үкімет әзірлеп, Құрылтайға ұсынуы тиіс.

«ҮШІНШІ Мен осы жылы жасанды интеллектіні орта білім беру саласына енгізу, цифрлық активтер индустриясын дамыту, Digital Qazaqstan стратегиясы туралы бірқатар Жарлық шығардым. Үкімет осы бағыттар бойынша қажетті заң жобаларын әзірлеп, Парламентке ұсынады», – деді Тоқаев.

Президент Қазақстанға жоғары білікті мамандарды, заманауи технологиялар мен шетел капиталын тарту үшін «Алтын визаны» енгізудің маңызы зор екенін айтты.

«Біз елімізге кәсіби тұрғыдан жоғары білікті мамандарды, заманауи технологияларды және шетел капиталын көптеп тарту үшін жүйелі шаралар қабылдап жатырмыз. Бұл іске тың серпін беру үшін «Алтын визаны» енгізудің маңызы зор», – деді ол.

Сонымен қатар мемлекет басшысы көші-қон саясатын жетілдіру қажеттігін атап өтті.

Оқи отырыңыз: 

Тоқаев үкіметті таратты

Тоқаев: Сайлау ашық әрі әділ өтті, өте жоғары деңгейде ұйымдастырылды