«Терезеден лақтырмақшы болған»: Ақтауда ер адам бұрынғы әйелін 2,5 сағат бойы ұрып-соқты

Ақтауда ер адам бұрынғы әйелін соққыға жықты, деп хабарлайды Orda.kz.

Бұл туралы ақтаулық блогер Азамат Сәpсенбаев әлеуметтік желідегі парақшасында айтты. Блогерден соққыға жығылған келіншек көмек сұраған. Әйелдің айтуынша, ер адам қаладағы тұрғын үй кешенінің бірінде бұрынғы әйелін екі жарым сағат бойы ұрып-соғып, тұншықтырған. 17-қабаттан лақтырамын деп қорқытқан.

Әйел айқайлап көмек сұрағанымен, тұрғындар полиция шақыруға асықпапты. Ер адам қашып кеткен. Әйел таңертең полицияға арыз жазған. Әйелді соққыға жыққан ер адамның үстінен қылмыстық іс қозғалды. 

Әйел күйеуімен жүйелі түрде таяқ жегені үшін ажырасқан. Бірақ бұған дейін полицияға арыз жазбаған екен. Жәбірленуші бұл жағдай тағы қайталанады деп қорқып, халық алдына шығуға бекінген. 

Айта кетейік, сәуір айында ақтаулық блогер Азамат Сәрсенбаевқа сыбайлас жемқорлыққа қарсы жалған ақпарат таратқаны үшін айып тағылған еді. Сонымен қатар 2024 жылы желтоқсанда Ақтау маңындағы ұшақ апатының орнын суретке түсіргені үшін осы блогерді полиция ұстап әкеткен.