Ақтаулық блогер Азамат Сәрсенбаевтың басы тағы дауға қалды

Ақтаулық блогер Азамат Сәрсенбаевқа сыбайлас жемқорлыққа қарсы жалған ақпарат таратқаны үшін айып тағылып жатыр, деп хабарлайды Orda.kz. 

Бұл туралы блогердің өзі әлеуметтік желідегі парақшасында айтты. Азамат Сәрсенбаев Антикордың оны сотқа бергенін мәлімдеді. Оның үстінен 73-3-бап, 2-бөлігі, яғни «көрінеу жалған ақпарат тарату» бойынша әкімшілік іс қозғалды. Блогердің жауапқа тартылуына Instagram-дағы жазбасы себеп болған.

Ол өз жазбасында сыбайлас жемқорлыққа қарсы іс-қимыл агенттігі қызметкерлерінің бірін сынға алған. Ол суреттегі мекеменің Антикор қызметкеріне қатысы барын айтқан. Құқық қорғау органдарының мәліметінше, блогердің жазбасы шындыққа жанаспайды екен. Блогерге 700 мың теңге айыппұл салынады немесе 25 тәулікке қамауға алынады. Сәрсенбаев қазақстандықтарға мемлекеттік органдардың жұмысын сынауға неге тыйым салынғанын түсінбейтінін айтты. 

Айта кетейік, 2024 жылы желтоқсанда Ақтау маңындағы ұшақ апатының орнын суретке түсіргені үшін осы блогерді полиция ұстап әкеткен еді.