Телефоны мен Telegram-ды тексерген: Әнші Нұрбек Айқынбаев Алматы полицейлеріне шағымданды

Полиция әншінің патрульдеу кезінде қызметкерлердің күдігіне іліккенін мәлімдеді. Ал өнер иесінің айтуынша, оны таксимен келе жатқан жерінен тоқтатып, жеке заттарын тексерген. Кейін смартфонын қарап, Telegram желісін ашқан, деп хабарлайды Orda.kz.       

Айқынбаев видео жариялады. Видеодан такси жүргізушісінің жолаушыны қорғап, полицейлерден оның телефонын қандай негізде тексеріп жатқанын сұрағанын естуге болады. 

Әнші Нұрбек Айқынбаев та наразылығын білдіріп, полицейлердің не себепті оның жеке хат-хабарларын оқып отырғанын түсінбегенін айтты.

Алматы қаласы полиция департаментінің мәліметінше, Айқынбаев қаланы патрульдеп жүрген қызметкерлердің күдігін тудырған.

«Оның жеке заттарына көзбен шолу жүргізілді. Тыйым салынған заттар мен заттай дәлелдер табылған жоқ. Тексеруден кейін ол жіберілді. Қызметкерлер қоғамдық тәртіп пен азаматтардың қауіпсіздігін қамтамасыз ету аясында жұмыс істеді»,  деп хабарлады департамент. 

Алайда полиция Айқынбаевтың нақты қандай әрекеті күдік тудырғанын және оның телефонындағы ақпаратты қандай негізде тексергенін нақтыламады.

Оқи отырыңыз:

• Қайсар Қамза ісінің жай-жапсары: ҚМА тағы төрт күдіктінің аты-жөнін атады
• Су күніне екі сағат қана беріледі: Ақши тұрғындары 10 жылдан бері мәселенің шешілуін күтіп жүр