Су күніне екі сағат қана беріледі: Ақши тұрғындары 10 жылдан бері мәселенің шешілуін күтіп жүр

Алматы облысы Іле ауданының Ақши ауылында су мәселесі тұрғындарды әбден қажытқан. Ауыл халқының айтуынша, бұл проблема бір-екі жыл емес, кемінде бес жылдан бері шешілмей келеді. Ал кей тұрғындар су тапшылығының зардабын он жылға жуық уақыттан бері тартып отырғанын айтады. Ауыл тұрғындары Orda.kz редакциясына хабарласып, көмек сұрады.

Су күніне екі рет беріледі

Ақши ауылында су күніне екі рет – таңертең және кешке екі сағаттан ғана беріледі. Тұрғындардың сөзінше, осы уақыт ішінде су жинап үлгергендер қажеттілігін өтейді, ал үлгермегендер сусыз қалады.

Ақши ауылының тұрғыны Жақсыгүлдің айтуынша, ауылда су мәселесі ол 2019 жылы көшіп келгеннен бері бар.

«Ақшиде өмірі су жоқ. Құбыр не жасалып, не жамалып бітпеді. Таңертең су беріледі дегенмен, ол уақытында берілмейді. Келген суды насосы бар үйлер алып қояды, кейбір үйге ол су жетпейді. Өзім 2019 жылы көшіп келгенмін, содан бері осы проблема», дейді ол.

Тұрғындардың айтуынша, ауылға күн сайын су таситын көліктер де қатынайды. Алайда суды бірінші болып алғандар қажеттілігін өтегенімен, егде жастағы адамдардың кейде су алуға мүмкіндігі болмай қалады.

«Қыста да жарылады, жазда да жарылады. Бау-бақша да екпейміз. Жалпы бұл проблеманың болғанына 10 жылдай болды»,  дейді Ақши тұрғындары.

Су құбыры 1972 жылы салынған

Ауыл әкімі де Ақшидегі су мәселесінің күрделі екенін мойындайды. Оның айтуынша, қазіргі уақытта су құбырларын жөндеуге қатысты 68 млн теңгеге жобалық-сметалық құжат дайындалған. Күрті ауылдық округінің әкімі Ғабит Рахымбайдың айтуынша, Ақшиға су 72 шақырым жердегі Қараой ауылынан келеді. Қолданыстағы су құбыры 1972 жылы салынған.

«Су Ақшиге 72 шақырым жердегі Қараой ауылынан келеді. Ол құбыр 1972 жылы салынған, елу жылдан асып кетті. Қазір су жетіспейді. Қыста күніне 300 текше метр су ішек, жазда 800 текше метр су жетпей жатыр»,  дейді Ғабит Рахымбай.

Қараой ауылынан тәулігіне 1500 текше метр су шығады. Алайда оның тек 800 текше метрі ғана Ақшиға жетеді.

Әкімнің айтуынша, тұрғындарға суды күніне үш рет беруге тырысқанымен, қолданыстағы құбырдың жағдайы оған мүмкіндік бермейді.

«Күніне үш уақыт су берейік деп ек, бірақ жеткізе алмадым. Бұған дейін бұл су құбырлары су министрлігінің балансында болған, қазір екі ай болды облыстық әкімдік балансына өтті. Бұған дейін қаражат болмады. Келесі жылы «Құрылыс жылы» аясында осы Ақшидың су мәселесі шешіледі»,  дейді әкім.

Ақши бірнеше жыл сусыз қалған

Ақши бұған дейін аудан орталығы болған. Алайда елді мекеннің аудан орталығы мәртебесі 1997 жылы жабылғаннан кейін ауыл біраз жыл бойы сусыз қалған. Тұрғындар ұзақ уақыт бойы құдықтың суын пайдалануға мәжбүр болған.

Күрті ауылдық округінің әкімі кейін су құбырының жалғанып, жөнделіп, қайта іске қосылғанын айтады. Бірақ соңғы жылдары ескі құбырдың жиі жарылуы жағдайды қиындатып отыр.

«Содан жалғап, жамап жүріп су құбыры қайта іске қосылды. Соңғы 4-5 жылда құбыр жиі жарылатын болды. Баяғыда 1972 жылы геологтар жерасты суын қазып, бірақ мүлдем жарамайды деп шешім шығарған. Сол себепті 70 шақырым жердегі Қараойдан құбыр тартуға тура келген»,  дейді Күрті ауылдық округінің әкімі.

Құбырды толық қалпына келтіруге 7,4 млрд теңге қажет

Қазір Ақши ауылындағы су құбырын толық қалпына келтіру үшін 7 млрд 400 млн теңге қажет.

Тұрғындар үшін су мәселесі әлі де өзекті болып отыр. Ал жергілікті әкімдік ескі құбырды жаңарту арқылы ауылдағы су тапшылығын шешуді жоспарлап отыр.

Оқи отырыңыз: 

• Күйеуін өлтірген әйелдің оқиғасы туралы жаңа деректер шықты
• Күн сайын 5 адам көз жұмады: Қазақстанда өкпе обырына қарсы жаңа скрининг басталады