Татарстанда Ахмет Байтұрсынұлының бұрын еш жерде жарияланбаған суреті табылды

Ұлт ұстазы Ахмет Байтұрсынұлының татар зиялыларымен бірге Қазан қаласында түскен тарихи суреті табылды, деп хабарлайды Orda.kz.

Ахмет Байтұрсынұлы 1927 жылдың күзіне қарай Қазанға араб жазуын реформалау жөніндегі комиссия мүшесі ретінде барған. Сол сапарда түсірілген сурет бүгінде Қазақстан тарихының жаңа қырын ашып отыр. Сурет Татарстан республикасының астанасы Қазан қаласында орналасқан Татарстан ұлттық мұражайынан табылды.

Бұл суретті ғалым Қайырбек Кемеңгер өзінің Facebook парақшасында жариялады.

Суретте әуелде тек татар зиялысы Мұхаммед Ыдырысовтың  ғана есімі көрсетіліпті. Сонымен қатар «Араб жазуын реформалау конкурсына қатысушылар. Қазан, 1927» деп жазылған. Қайырбек Кемеңгердің айтуынша, 22 адамның арасында Ахмет Байтұрсынұлы — жалғыз қазақ.

Қазандағы мұражай қызметкері Гүлнәз Жиһангерова жәдігерді тапқан сәтінде суреттің шығу тарихына қатысты деректерді ұсынған екен.

«Ұлт ұстазы Ахмет Байтұрсынұлының татар зиялыларымен Қазан қаласында түскен суреті. Көрнекті қайраткер Татарстан астанасына 1927 жылдың күз айында араб жазуын реформалау жөніндегі комисмия мүшесі ретінде барған екен» деп жазды Қайырбек Кемеңгер.

Еске сала кетсек, биыл 31 мамыр күні «Almaty Theatre» ғимаратында болуы керек саяси қуғын-сүргін мен ашаршылық құрбандарын еске алуға арналған концерт өтпей қалған еді. Еркеш Шәкеев ұйымдастырмақ болған концертте Алаш жинағының тұсаукесері өтуі керек болған. Бұл ашаршылық құбандары мен репрессия кезінде қудаланған қазақ зиялыларына арналған ауқымды шара болатын еді.