Ташиев 2027 жылы президент болуы мүмкін еді: Жапаров өз жоспарын ашып айтты

Президент Садыр Жапаров 2027 жылғы президент сайлауына қатысудан бас тартып, оның орнына Камчыбек Ташиевті қолдау нұсқасын қарастырған. Бұл туралы президент журналист Али Токтакуновқа берген сұхбатында айтты, деп хабарлайды Orda.kz.

Жапаровтың сөзінше, президенттік мерзімі аяқталғаннан кейін демалысқа кетуді жоспарлаған. Ол кезде 2027 жылғы сайлауға Камчыбек Ташиев қатысуы мүмкін 

«2027 жылы алты жылдық президенттік мерзімім аяқталғаннан кейін, егер Камчы дайын болса, мен 2027 жылғы қайта сайлауға қатыспаймын деп ойладым. Камчы президент болып, мен демалысқа кетер едім. Менің жоспарым осындай болды. Оған бір жыл бұрын өзім осы туралы айтқанмын. Мен төрт жыл шетелде тұрдым, төрт жыл түрмеде отырдым, соңғы алты жылымды да бақылауда жүргендей өткіздім. Шашым ағарды, немерелерім дүниеге келді, отбасыммен бірге болғым келді. Мен оған: “Дайын бол, айналаңды тазала, өз адамдарыңды тәрбиеле”, – дедім.

Кейін қарасам, ол дайын емес. Оның қызметкерлері өздерін тиісінше ұстамайды, айналасындағы адамдардың кейбірі шектен тыс жоғарылап кетті. 75 ақсақалдың хаты пайда болған кезде, парламентті генералдың жақтастары және басқалар деп бөле бастағанда, мен оны шақырып:

“Бұлай болмайды. Адамдарды бөлуге болмайды. Халықты солтүстік пен оңтүстікке бөлгендерді қатаң жазалап жатырмын, өйткені халық енді ғана біріге бастады. Сондықтан ренжіме, мен сені қызметтен босатамын. Егер сайлауға қатысқың келсе, оған барлық жағдайды жасаймын”, – дедім», – деді президент.