Таразда«өзін-өзі тонап», қарақшылық туралы экшн сценарий ойлап тапқан әйелге сот үкімі шықты

Тараз қаласында қылмыс жасалғаны туралы көрiнеу жалған сөз жеткiзгені әйел сотталды, деп хабарлайды Orda.kz.      

Тараз қаласының тұрғыны құқық қорғау органдарына өзін шабуыл құрбаны ретінде көрсеткен. Оның сөзінше, үйіне бетперде киген белгісіз ер адам кіріп, қарумен қорқытып, қолын байлап, алтын әшекейлері мен ақшасын алып кеткен. Әйелдің арызынан кейін полиция қызметкерлері сотқа дейінгі тергеу амалдарын бастап, жедел қызметті іске қосқан.

Тараз қаласының №2 соты қылмыс жасалғаны туралы көрiнеу жалған ақпарат беру фактісі бойынша азаматша Н.-ға қатысты қылмыстық істі ҚК 419-бабының 2-бөлігі бойынша қарады. 

Сот сотталушы Н. өзінің алтын зергерлік бұйымдарын ломбардқа тапсырып, барлық ақшаны белгісіз адамдар көрсеткен шоттарға «трейдинг оқытуы» үшін аударып жібергенін анықтады.

Кейінірек курстардың жалған екенін және ақшаны қайтара алмайтынын түсінген соң, ол қылмысты қолдан жасау арқылы өз әрекетін отбасынан жасыруға шешім қабылдады. Сотталушы келінінің алтын және гауһар зергерлік бұйымдарды жасырып, өзін скотчпен байлап, үйге белгісіз адамдар кіріп, күш қолданып, оның мүлкін иемденді деп мәлімдеді.

Біз бұл туралы Тараз тұрғыны күйеуінен алтын сатқанын жасыру үшін «өзін-өзі тонап», қарақшылық туралы экшн сценарий ойлап тапқаны туралы наурыз айының басында жазған болатынбыз.  

Полиция жүргізген тергеу нәтижесінде қылмыс туралы мәлімдеменің жалған екендігі анықталды. Н.-нің кінәсі тараптардың, куәлердің айғақтарымен және тергеу әрекеттері хаттамаларымен расталды.

Прокурор сотталушыға 2 жылға бас бостандығынан айыруды тағайындауды, ал сотталушы кінәсін мойындап, соттан қатаң жаза тағайындамауды сұрады.

Сот үкімі бойынша ҚК 419-бабы 2-бөлігінің санкциясы 4000 АЕК-ке дейінгі мөлшерде айыппұл салу не сол мөлшерде түзеу жұмыстары, не 1000 сағатқа дейінгі мерзімге қоғамдық жұмыстарға тарту, не 5 жылға дейінгі мерзімге бас бостандығын шектеу не айыру түріндегі жазаны көздейді.

Сот соттылықтың жоқтығын, кінәсін мойындауын және өкініш білдіргенін жеңілдететін мән-жайлар ретінде таныды. Ауырлататын мән-жайлар анықталған жоқ.

Сот үкімімен Н. ҚК 419-бабының 2-бөлігі бойынша кінәлі деп танылып, оған пробациялық бақылау белгілей отырып, 2 жыл бас бостандығын шектеу түріндегі жаза тағайындалды.

Үкім заңды күшіне енген жоқ.

Оқи отырыңыз:

• Тараз тұрғыны «өзін-өзі тонап», қарақшылық туралы экшн сценарий ойлап тапқан
• «Кінәлі болғанымды мақтан көрем!»: Ресейде Павел Дуровқа шақыру қағазы келді
• Қостанай облысында әйел TikTok пен Instagram-да есірткі дүкенін жарнамалаған