«Кінәлі болғанымды мақтан көрем!»: Ресейде Павел Дуровқа шақыру қағазы келді

Белгілі миллиардер әрі Telegram мессенджерінің негізін қалаушы Павел Дуров өзіне күдікті ретінде тергеуге шақыру қағазы келгенін мәлімдеді. Құжат оның Ресейдегі жиырма жыл бұрынғы тіркеу мекенжайына жіберілген, деп хабарлайды Orda.kz.      

Кәсіпкер бұл туралы 2026 жылғы 22 сәуірде өзінің Telegram арнасында жазды.

«Ресейде жиырма жыл бұрын тұрған пәтеріме «күдікті П. В. Дуровқа» арналған шақыру қағазы келіпті. Олар мені сөз бостандығын және жеке хат алмасу құқығын кепілдендіретін Ресей Конституциясының 29 және 23-баптарын қорғағаным үшін күдіктеніп отырған шығар. Ондай болса, кінәлі екеніме мақтанамын!»  деп жазды Дуров. 

Биылғы ақпан айында ресейлік БАҚ-тарда жарияланған мәліметке сәйкес, Telegram мессенджерінің тең құрылтайшысы Павел Дуровқа қатысты Ресей Федерациясы Қылмыстық кодексінің 205.1-бабы («Террористік қызметке жәрдемдесу») бойынша қылмыстық іс қозғалған болатын. 

Ресейдің ФСБ деректеріне сүйенсек, 2022 жылдан бері Telegram платформасын пайдалану арқылы жасалған қылмыстар саны айтарлықтай өсіп, 153 мыңнан асқан. Оның 33 мыңы диверсиялық-террористік және экстремистік әрекеттермен байланысты болған. Атап айтқанда, жарылыс ұйымдастыру, әскери комиссариаттарды өртеу және кісі өлтіру фактілері тіркелген.

Ресей БАҚ-тарында жарияланған ақпаратқа сенсек, жүргізілген арнайы операциялар нәтижесінде ФСБ Telegram арқылы жоспарланған 475 террористік актінің алдын алған. Олардың ішінде кәмелетке толмағандар жоспарлаған мектептердегі 61 жаппай кісі өлтіру әрекеті болған.

Оқи отырыңыз:

• Ресей Павел Дуровқа қатысты қылмыстық іс қозғады
• «Өз халқынан именетін мемлекеттің қасіретті халі»: Дуров Ресей билігіне жауап қатты
• Павел Дуров 106 балаға мұра қалдырды, бірақ ақшаға тек 30 жылдан кейін ғана қол жетеді
• Павел Дуров: Telegram ай сайын заң бұзғаны үшін 15-тен 20 миллионға дейін аккаунтты жояды