Тараздағы аутизмі бар баланың қол-аяғын байлап, ұйықтатпақ болған оқиғаға қатысты қылмыстық іс қозғалды

Тараздағы оңалту бағытындағы балабақшалардың бірінде аутизмі бар алты жастағы баланың қол-аяғын байлап, ұйықтатпақ болғаны туралы анасы шағым түсірген еді. Осы резонанс тудырған оқиғадан кейін қылмыстық іс қозғалғаны белгілі болды, деп хабарлайды Orda.kz.       

Баланың анасы Фариза оқиғаға қатысты бейнежазбаны Orda.kz редакциясына ұсынып, сұхбат берген болатын. Анасының сөзінше, балабақша қызметкері баланы ұйықтатуға тырысып, оны байлаған. Фариза баласының түстен кейін ұйықтамайтынын тәрбиешілерге алдын ала ескерткен. 

Тараз қаласында  болған оқиға әлеуметтік желіде тез атап кетті. Оңалту балабақшаларының бірінен түсірілген бейнежазбаға қатысты полиция қылмыстық іс қозғады. Кадрларда қолы мен аяғы байланған баланың төсектен тұруға қайта-қайта тырысып, құлап қалып жатқаны көрінеді. Осыдан кейін тәрбиеші баланы көтеріп алып, қайтадан төсекке жатқызған.

Фаризаның айтуынша, бұл аталған балабақшадағы алғашқы жағдай емес. Бір ай бұрын дәл осы жерде тәрбиешінің баласын ұрғаны мәлім болған. Анасы сол оқиғаға байланысты да алаңдаушылық білдірген.

Қазір Фариза баласымен бірге ауруханада. Оның айтуынша, бала балабақшада төсектен құлап, басын жарақаттаған. Дәрігерлер баланың басындағы жарақатты тігіп берген.

Ал балабақша өкілі жағдайды басқаша түсіндірді. Мекеме өкілінің айтуынша, балабақшада өз-өзіне жарақат келтіруі мүмкін балалар бар.

Оқиғаға қатысты полиция тергеу жүргізіп жатыр. Қазір баланың жарақат алуына не себеп болғаны және бейнежазбада көрсетілген әрекеттердің заңдылығы нақты анықталуда.

Оқи отырыңыз:

• Таразда аутизмі бар баланы балабақшада байлап ұйықтатпақ болған: Анасы жай-жапсарын айтты
• Талғар тауында сүйегі табылған адамның туыстары оның 20 жыл бұрын жоғалып кеткенін мәлімдеді