Таразда аутизмі бар баланы балабақшада байлап ұйықтатпақ болған: Анасы жай-жапсарын айтты

Тараздағы коррекциялық балабақшалардың бірінде аутизмі бар алты жастағы баланың қол-аяғын байлап, ұйықтатпақ болғаны туралы шағым түсті. Баланың анасы Фариза оқиғаға қатысты бейнежазбаны Orda.kz редакциясына ұсынып, сұхбат берді.

Анасының айтуынша, оқиға бүгін сағат 12:30 шамасында болған. Оның сөзінше, балабақша қызметкері баланы ұйықтатуға тырысып, оны байлаған. Фариза баласының түстен кейін ұйықтамайтынын тәрбиешілерге алдын ала ескерткенін айтады.

«Мен балабақшаға баламның түстен кейін ұйықтамайтынын айтқанмын. Соған қарамастан осындай жағдай болған»,  дейді анасы.

Фаризаның айтуынша, бұл аталған балабақшадағы алғашқы жағдай емес. Бір ай бұрын дәл осы жерде тәрбиешінің баласын ұрғаны мәлім болған. Анасы сол оқиғаға байланысты да алаңдаушылық білдірген.

Қазір Фариза баласымен бірге ауруханада. Оның айтуынша, бала балабақшада төсектен құлап, басын жарақаттаған. Дәрігерлер баланың басындағы жарақатты тігіп берген.

Балабақша өкілдері болған жағдайды жаңа келген маманға баланың ерекшеліктері туралы алдын ала айтпағанымен түсіндірген. Яғни қызметкер баланың түстен кейін ұйықтамайтынын және оған қатысты басқа да қажетті ақпаратты білмеген.

Orda.kz редакциясы балабақша тарапынан оқиғаға қатысты толық түсініктеме алуға тырысады. Оқиғаға байланысты жауапты органдардың ұстанымы әзірге белгісіз.

Редакция баланың қауіпсіздігіне қатысты жағдайды бақылауда ұстап, балабақша мен уәкілетті органдардың жауабын жариялайды.

Оқи отырыңыз: 

• Үкімет басшысы 100-ден астам мектептің жөндеу жұмысын екі аптада аяқтауды тапсырды
• Оқушылар арасында ауру көбейді: 242 мың бала есепке алынды