Күйеуін өлтірген әйелдің оқиғасы туралы жаңа деректер шықты

17 жылға жуық отасқан күйеуін пышақтап өлтірді деп айыпталған Алматы облысының тұрғынын сот ақтап шығарғаны туралы ақпарат тараған болатын. Бесінші баласына жүкті әйелдің күйеуін не себепті өлтіргені, бұған дейін отбасында қандай жағдайлар болғаны және соттың оны неге ақтағаны қоғамның назарын аударды. Orda.kz тілшісі екі тараптың да уәжін тыңдады.

Күйеуін пышақтап өлтірген әйел алқабилердің шешімімен кінәсіз деп танылып, қылмыстық жауапкершіліктен толық босатылды. Іс қайта сараланбаған, әйелге ешқандай шарт қойылмаған. Сот өндірісі тоқтатылған.

Қорғаушы Ғалым Нұрпейісовтің айтуынша, оқиға 1 қыркүйекте болған. Жанжал кезінде ер адам әйелін тағы да ұрған. Әйел көшеге қашып шығып, көршілерінен полиция шақыруды сұраған. Алайда оған ешкім көмектеспеген. Сол жерде туыстары мен көршілері де болған.

Әйел балаларын алып, туыстарына кету үшін үйіне қайта оралған. Осыдан кейін бұған дейін қоғамға белгілі оқиға болған. Қорғаушы әйелдің қылмыстық жауапкершіліктен толық босатылғанын айтты.

«Іс қайта сараланған жоқ, ешқандай шарт қойылған жоқ. Барлығы тоқтатылды. Ол кінәсіз деп танылды. Ол ештеңе төлемейді, өйткені іс тоқтатылды»,  деді қорғаушы.

Оның айтуынша, алқабилердің үкімі кісі өлтіруді ақтау дегенді білдірмейді.

«Кісі өлтіру деген не? Кісі өлтіру – қылмыс құрамы. Алқабилер оның адам өлтіру ниеті болмағанын көрсетті. Сондықтан іс те тоқтатылды. Әдеттегі сот тәжірибесінде мұндай баптар әрекетті аффект жағдайында жасау немесе қажетті қорғаныс шегінен шығу ретінде қайта саралануы мүмкін. Бірақ бұл жағдайда ондай болған жоқ. Мұнда алқабилер әйелді ақтап, іс бойынша өндірісті тоқтату туралы үкім шығарды»,  деді ол.

Ғалым Нұрпейісовтің айтуынша алқабилер шешімін қоғамның Қазақстанда болған зорлық-зомбылықтың кез келген түріне нөлдік төзімділік танытуы деп бағалады. Қорғаушының айтуынша, бұл жерде алқабилер 1 мамырдағы оқиғаға қатысты бірнеше сұраққа жауап берген.

«Бірінші сұрақ бойынша алқабилер 1 мамырда оқиғаның болғанын, сол жерде адамның қайтыс болғанын және бұл оқиғаға менің қорғауымдағы азаматшаның қатысқанын дәлелденген деп таныды. Ал үшінші сұрақта, яғни оның әрекетін кісі өлтіру деп бағалап, осы әрекетті жасағанына кінәлі ме деген сұраққа алқабилер «жоқ, кінәлі емес» деп жауап берді», – деді қорғаушы.

Ол Қылмыстық кодекстің 99-бабында көзделген кісі өлтіру мен қылмыс құрамына қатысты түсініктеме берді.

«Бұл кісі өлтіруді ақтау емес. Бұл жерде алқабилер қылмыс құрамының заң тұрғысынан жоқ екенін көрсетіп отыр. Ал қылмыс құрамы дегеніміз – объект, субъект, объективтік және субъективтік жақ. Объект – адамның өмір сүру құқығы. Объективтік жағы – қылмыстың жасалған орны, уақыты және жасалу тәсілі», – деді ол.

Марқұмның туыстары не дейді?

Orda.kz редакциясының тілшісі қайтыс болған Дәуреннің туыстарымен де сөйлесті. Олардың айтуынша, келіндері өте қызғаншақ болған.

«Дәурен – менің жалғыз ағам, арамыз 12 жас. Менің 8 жасымда Мадина келін болып түсті. Арасында отбасылық жанжал болатын. Жеңгем талай кетіп қалып, талай қайтып келді. Араларында алты жыл бала болмады. Бірақ ағам жеңгемді тастаған жоқ. Менің өз ойым, жеңгем өте қызғаншақ болатын. Ағамды орынсыз қызғанатын. Өз басым жеңгеммен ешқашан жанжалдасқан емеспін. Мен олардың жеке өміріне араласқан жоқпын. Ата-анама тіл қайтарса да, жеңгеме қарсы сөз айтқан емеспін», дейді марқұм Дәуреннің қарындасы Ардақ Әмірқұлова. 

«Ағамды өлтірді»

Ардақ әйел адам ретінде Мадинаға жаны ашитынын айтқанымен, ағасын өлтіргені үшін оны кешірмейтінін айтады.

«Адамды өлтіру, өлтірмеу деген таңдау Мадинада болды. Пышақпен үйге кіргенде ағам оған тиіскен жоқ. Төсекте ұйықтайын деп жатты. Мадина кіріп келіп, «саған тығам» деген. Ағам «тықсаң, тық» деген. Бір ғана пышақпен жасалған соққы дәл жүрегіне кірген. Ол аффект жағдайында болған жоқ. Тергеу кезінде Мадинаның ауытқуы болмағаны анықталды»,  дейді марқұм Дәуреннің қарындасы.

«Ақкөңіл, ашық-жарқын еді»

Дәуреннің туыстарының айтуынша, Мадина кетем десе, оны ешкім ұстамаған. Олар марқұмның ақкөңіл әрі мейірімді адам болғанын айтады.

«Ешкімнен көмегін аямайтын, ашық-жарқын болатын. Ауылға келіп, кез келген адамнан сұрасаңыз болады. Ал ағамның жұқпалы аурумен ауырғаны туралы нақты дәлел жоқ. Өлген адамның артынан бәрін айта беруге болады», – дейді Ардақ.

Ал ағасының басқа әйелдермен көңіл қосқаны туралы сұраққа Ардақ мұндай жағдайды естімегенін айтты.

«Ағамның екі рет үйленбек болғаны туралы естіген жоқпын. Бірақ екі жыл бұрын жеңгем бес айға кетіп қалғанда, ағам маған: «Мен Макодан тойдым, тұрғым келмейді. Басқа әйел алғым келеді», – деді. 

Бірақ анам Дәуреннің ажырасам дегеніне көнбеді, өйткені немерелерін қимады», – дейді Ардақ Әмірқұлова.

Марқұмның туыстары сот үкімімен келіспейтінін айтты. Олардың пікірінше, адам өлімі жазасыз қалмауы керек. Осыған байланысты олар апелляциялық шағым түсірмек.

Үкім шыққан кезде марқұмның туыстары алқабилерге және бұрынғы келіндерінің туыстарына ашу-ызаларын білдірген. Іс бойынша әйелдің туыстарының айтуынша, оқиға орнына тіпті полиция шақыруға тура келген.