Сотталған блогер Жанәбіловтер амнистияға ілінуі мүмкін

Қорғаушы Гаухар Айтжанова қорғауындағы сотталған ерлі-зайыпты блогер Жанәбіловтер амнистияға ілінуі мүмкін екенін мәлімдеді, деп хабарлайды Orda.kz.

Оның айтуынша, қазіргі уақытта жаңа Конституцияның қабылдануына байланысты көпшілік амнистия жөніндегі шешімді күтіп отыр.

«Әзірге заң жобасын көрген жоқпын, сондықтан нақты ештеңе айта алмаймын. Бірақ тәжірибеде экономикалық қылмыстар бойынша келтірілген шығын толық өтелсе, жаза мерзімі қысқартылуы мүмкін. Кей жағдайда толық босату да қарастырылуы ықтимал», – деді адвокат.

Сонымен қатар ол қорғаушы ретінде қазіргі нәтижеге қанағаттанатынын жеткізді.

«Мен қорғауымдағы азаматтардың бостандықта жүретініне ризамын. Біз апелляциялық шағым түсірмейміз. Екі жылға кейінге шегеру берілді. Екі жылдан кейін, егер Эльмира тарабынан қандай да бір бұзушылықтар болмаса, әкімшілік немесе өзге де құқық бұзушылықтар жасалмаса, сот өкінгенін және талап-арыздың өтелгенін ескере отырып, оны әрі қарайғы жазадан босатуы мүмкін», – деді ол.

Еске сала кетейік, Жанәбіловтер тергеумен келісімге келген еді.

Оқи отырыңыз:

• Ерлі-зайыпты блогер Жанәбілевтерге сот үкімі шықты
• «247,6 млн теңге көлеміндегі шығынды толық өтеген»: Жанәбіловтер тергеумен келісімге келді