Сотта Ұлдана Мырзуан қаза тапқан үйдегі жөндеу жұмыстары айтылды

Астанадағы ауданаралық қылмыстық сотта фельдшер ұлдана Мырзуанның қазасына қатысты сот процесінде МИБ (мүлік иелерінің бірлестігі) бұрынғы төрайымы Гүлжаухар Ахметова жауап берді, деп хабарлайды Orda.kz.

Гүлжаухар Ахметова, ол 2019 жылғы 23 наурыздан 2025 жылғы 30 сәуірге дейін кондоминиумның сенімді өкілі болған. Үйді басқаруға кіріскен кезде кондоминиумға қатысты құжаттар болмаған. Сондықтан ол ең алдымен құжаттарды қалпына келтіргенін айтты.

«Қызметтен кеткен кезде барлық құжатты Сәуле Жұбаниязоваға тапсырдым. Олардың арасында пәтер иелері туралы мәліметтер, техникалық паспорт, орнатылған лифтілерге қатысты құжаттар, 27 бейнебақылау камерасына қатысты материалдар, жеткізушілер және сервистік ұйымдармен жасалған келісімшарттар, тұрғын емес үй-жайлардың иелерімен жасалған шарттар болды. Сондай-ақ, 2017 жылғы ғимараттың техникалық жағдайын зерттеу қорытындысы болды. Құжаттарды тапсыру кезінде куәгерлер қатысты», – деді Ахметова. 

Ол бұрынғы сенімді өкіл Ақшалованың өзіне тапсырған үйдің техникалық жағдайын зерттеу қорытындысына ерекше тоқталды. Бұған дейін осы үйдің тұрғындары Ахметованы өз міндетін дұрыс атқармады деп айыптаған еді.

Куәгердің сөзінше, 2017 жылғы қорытындыда үйдің жағдайы қанағаттанарлық деп көрсетілген және негізгі конструкцияларға өзгеріс енгізу қажет болмаған. Алайда мамандар жөндеуді қажет ететін бірқатар ақауды анықтаған.

«Лифт шахтасының үстіндегі шатырды жөндеуге кеңес берілді. Ол жерде кірпіш қабырғаның бір бөлігі толықтай опырылып, шатырдың үстінде жатқан. Жертөлені жөндеу және сыртқы қабырғалардың зақымданған бөліктерін қалпына келтіру қажет болды. Осы жұмыстардың барлығын жасаттым, кірпіш қалануы жоқ лифт шахтасының маңындағы бөлікті жөндеп, жертөледе де жұмыстар жүргіздім», – деді  куәгер.

Сонымен қатар, ол №29 пәтер тұрғындарының шағымын еске алды. 2017 жылы олар төбеден құрылыс элементтері түсіп жатқанын хабарлаған. Техникалық зерттеу қорытындысын зерделегеннен кейін куәгер үйдің жағдайын қосымша тексеруді ұйғарған. Ол үшін өнеркәсіптік альпинистерді шақырып, тексеру барысында мамандар бірінші кіреберістегі балкондардың үстінде, техникалық және тоғызыншы қабаттағы қабырғада ақау барын анықтаған.

«Мәселе анықталғаннан кейін альпинистерді шақырдым. Олар кірпіш қаланған бөлікті арнайы бекіткіштермен бекітті. Кейін зақымданған жер сыланып, үйдің түсіне сәйкестендіріліп жасырылды. Мамандар ғимараттың шеткі бөлігін де тексерді, ол жерде сәндік кірпіш элементтері болған. Альпинистер олардың ар жағынан бос жерлерді анықтады», – деді Ахметова.

Оның айтуынша, мамандар бос жерлерді қабырғадағы мәселелерді ретке келтірген, үйдің шатыры да толық жөнделген.  Куәгер жүргізілген жөндеу және тексеру жұмыстарын растайтын барлық құжатты тергеушіге тапсырғанын атап өтті. Ал жаңа төрайым Сәуле Жубаниязоваға құжаттарды 2025 жылғы 30 сәуірде берген.

Оқи отырыңыз:

Алматыда ер адам 9 жастағы қызға жыныстық сипаттағы әрекет жасады деген күдікке ілікті

Ұлдана Мырзуанның өлімі: Сотта жедел жәрдем мен ТЖД әрекеті талқыланды