Соққыға жығылған зейнеткер: Әкім орынбасары мен мектеп басшылығы жазаланды

Теміртауда зейнеткер соққыға жығылғаннан кейін әкімнің орынбасары мен мектеп басшылығы жазаланды, деп хабарлайды Orda.kz.

Еске салайық, кәмелетке толмаған жастар қарт адамның үйіне кіріп, оны ұрып-соғып, бетіне түкіріп, қорлаған. Онымен қоймай, осы болған жағдайды видеоға түсіріп алған. 

Қарағанды облысының полицейлері жасөспірімдердің ұсталып, изоляторға қамалғанын хабарлады. 67 жастағы зейнеткерге шабуыл жасағандардың үстінен қылмыстық іс қозғалды.

Теміртау әкімінің орынбасары қатаң сөгіс алды. Сондай-ақ жасөспірімдер оқыған білім беру мекемелерінің орынбасарлары тәртіптік жауапкершілікке тартылды. Кәмелетке толмағандар істері жөніндегі комиссия отырысында осындай шешімдер қабылданды.

Айта кетейік, бұған дейін қарияны соққыға жыққан жасөспірімдерді қатарластары ұрып кетті. 

Бүгін ішкі істер министрінің орынбасары Игорь Лепеха жалпы сегіз жасөспірімнің ұсталғанын айтты. Төрт жасөспірім қарт адамға шабуыл жасаған болса, қалған төртеуі зейнеткерді соққыға жыққандарды ұрып кеткендер.

Еске сала кетейік, Шуда жүкті әйелдің қайтыс болуына қатысты бірнеше дәрігер жұмыстан қуылды.