Шымкентте колонияда жатып бюджеттен 1,3 миллиард қаражат жымқырған әйел әшкере болды

Шымкеннтте колонияда бюджет қаражатын жымқырғаны үшін жазасын өтеп жатқан әйел тағы бір миллиардты жымқыру схемасын ойлап тапқан, деп хабарлайды Orda.kz.       

Қаржылық мониторинг агенттігі (ҚМА) Шымкентте білім беру саласына бөлінген бюджет қаражатын жымқыру дерегі бойынша қылмыстық істің тергелуі туралы мәлімдеді. Тергеу нұсқасына сәйкес, 2018–2023 жылдар аралығында екі колледж жалған оқыту алаяқтығы бойынша жұмыс істеген.

Іс бойынша колледж басшылары, бухгалтерлер және басқа да қатысы бар тұлғалар күдікті ретінде қарастырылып жатыр.

ҚМА деректеріне сәйкес, азаматтар жалған студенттерді тіркеген, бірақ іс жүзінде ешқандай жұмыс жүргізілмеген. Соның арқасында білім беру тапсырысы мен кадрларды қайта даярлау бағдарламалары бойынша мемлекеттік қаржыландырумен қамтамасыз етілген.

«Қылмыстық схема жалған оқуға қабылдау және жұмысқа орналастыру туралы бұйрықтарды рәсімдеу, құжаттарды растау үшін электрондық цифрлық қолтаңбаларды пайдалану, сондай-ақ атқарылған жұмыстардың жалған актілерін жасау арқылы жүзеге асырылған»,  деп хабарлады ҚМА. 

Сонымен қатар, медициналық колледждің ақылы бөлімінде оқыған кейбір студенттер мемлекеттік грантпен оқитындар ретінде рәсімделген.

ҚМА мәліметінше, «Оңтүстік Қазақстан гуманитарлық-қаржы колледжі» іс жүзінде жұмыс істемеген және тек бюджет қаражатын алу үшін ғана пайдаланылған. Мемлекетке келтірілген жалпы шығын 1,3 миллиард теңгеден асқан.

«Айта кетерлігі, схеманы ұйымдастырушы соңғы үш жыл бойы бұрын жасаған қылмысы үшін бас бостандығынан айыру орындарында отырып-ақ заңсыз әрекетті басқарып, жүргізген. Тергеу барысында күдіктілер өз еркімен 65 миллион теңгені өтеді»,  деп мәлімдеді ҚМА. 

Сот үш пәтерге (оның ішінде Дубайдағы жылжымайтын мүлік), үш тұрғын үйге және үш автокөлікке тыйым салды.

Екі күдікті қамауға алынды. Тағы үш адамға елден шықпау және тиісті мінез-құлық туралы қолхат түріндегі бұлтартпау шарасы қолданылды.

Еске салсақ, жақында Қасым-Жомарт Тоқаев Қаржылық мониторинг агенттігінің төрағасы Жанат Элимановты қабылдады. Президентке агенттік қызметінің негізгі қорытындылары мен алдағы кезеңге арналған міндеттері жөнінде баяндалды. Жанат Элиманов бюджет шығыстарына жүргізілген мониторинг кезінде мал шаруашылығы саласына бөлінген 30 миллиард теңге субсидияны тиімсіз пайдалану тәуекелдері анықталғанын айтты. 

Оқи отырыңыз:

• ҚМА: 78 жәбірленуші қаржы пирамидасына 110 млн теңге салған
• ҚМА төрағасы президентке қылмыстық табысқа қарсы күрестегі атқарылған жұмыстарды баяндады
• Алматы құрылыс бақылау басқармасы заңсыз лицензия таратқан: қылмыстық схема әшкере болды