Швейцарияға ең жоғарғы баж салығы: Трамп жаңа салығымен Еуропаны еңіретіп жатыр

АҚШ Президенті Дональд Трамп Швейцариядан әкелінетін импортқа еуропалық елдер ішіндегі ең жоғары баж салығын енгізді. АҚШ бұл шешімді Швейцария Конфедерациясының құрылған күніне сәйкес келетін мерекеде жария етті, деп хабарлайды Orda.kz The New York Times-қа сілтеме жасап.

Швейцариялық өндірушілердің айтуынша, ондаған мың жұмыс орнына қауіп төніп тұр.

Бұл альпілік ел үшін жағдай қиын. Дегенмен, фармацевтика өндірісі секторы біршама тұрақтылық танытқанымен, бұрынғы 15% баж салығы енді 39%-ға дейін көтерілді.

Бұл жаңа алым бастапқыда ұсынылған 31%-дан да жоғары. Швейцариялық шенеуніктер ол деңгейді «түсініксіз» деп атаған еді. Енді жаңа тарифтер АҚШ-ты фармацевтика, сағат, құрал-жабдық және шоколад сынды тауарлар бойынша басты экспорттық нарық санайтын бұл шағын ел үшін ауыр соққы болды.

Швейцария БАҚ-ы үкімет баж салығы 10% шамасында болады деп күткенін хабарлады.

АҚШ неге мұндай қадамға барды? 

Ақ үй бұл шешімге Берннің сауда тосқауылдарын төмендетуге нақты қадам жасамағаны себеп болды дейді.

«Әлемдегі ең бай және жоғары табысты елдердің бірі бола тұра, Швейцария АҚШ-тан біржақты сауда қатынасына төзгенін күте алмайды», — деп мәлімдеді Ақ үй өкілі. 

Швейцария үкіметі бұл шешімге қатысты «ренішін» білдіріп, алдағы әрекеттерін пысықтайтынын айтты. Ел Президенті Карин Келлер-Зуттер Reuters агенттігіне берген сұхбатында:

«Біз келіссөздерді жалғастырамыз, бірақ ұсынатын жеңілдіктер шектеулі болады. Өйткені АҚШ импорты біздің нарыққа **99,3% деңгейінде еркін қол жеткізіп отыр», — деді.

Қай сала қатты зардап шегеді?

Швейцариядан АҚШ-қа экспортталатын негізгі өнім – фармацевтика. Өткен жылы бұл экспорт 35 миллиард долларды құраған. Алайда дәрі-дәрмек өндірушілер әзірге жаңа салықтан зардап шекпейді, дейді ресми тұлғалар.

«Бұл тарифтердің ешқандай экономикалық негізі жоқ және олар толықтай еркін түрде ойдан шығарылған... Бұл алым швейцариялық индустрияға ауыр соққы болады, әсіресе ЕО, Ұлыбритания мен Жапониядағы бәсекелестердің салықтары әлдеқайда төмен екенін ескерсек. Бұл — экспорттық сала мен бүкіл ел үшін үлкен шок», — деді Swissmem ұйымының өкілі Жан-Филипп Коль. 

Швейцариялық сағат өнеркәсібі федерациясының дерегінше, АҚШ — елдегі ең ірі шетелдік сағат нарығы. Ал элиталық сағаттарды сатумен айналысатын компаниялар бұл салықтарды «қорыту қиын» деп бағалады.

Тарифтер қашан күшіне енеді?

Жаңа мөлшерлеме 7 тамызда күшіне енеді, ал жағдайды білетін швейцариялық дереккөз келіссөздер жалғасатынын айтады.

АҚШ Президенті Дональд Трамп енгізген жаңа салықтар әлем бойынша ондаған сауда серіктесіне әсер етіп, жұма күні әлемдік қор нарықтарында құлдырауға себеп болды, деп хабарлайды Reuters.

 Көптеген елдер мен компаниялар тиімді келісімдерге қол жеткізудің жолдарын іздеуге мәжбүр.

Үндістан – 25% салық енгізілген, келіссөзді жалғастырмақ.
Канадаға – 35% салық.
Бразилияға – 50% салық.
Тайваньға – 20% салық салынды.

Бұған дейін Қазақстанға да 25% көлемінде  салық енгізілген болатын. Бұл шешім 1 тамызда емес, бір аптадан кейін күшіне енеді.

Дегенмен Қазақстан АҚШ тарапынан  қосымша тарифтердің енгізілуіне байланысты келіссөздерді жалғастырып жатыр. Сауда министрлігінің мәліметінше, енгізілген баж салықтары АҚШ-қа қазақстандық экспорттың жалпы көлемінің тек 4,8%-ына ғана әсер етуде, ал қалған 95,2%-ы жаңа тарифтерге жатпайды, деп хабарлады.  

Сәуір айының ортасында Қазақстаннан АҚШ-қа импорттық баж бойынша консультация алу үшін делегация жіберілді. 

Мамыр айының ортасында АҚШ президенті Дональд Трамп Ұлыбританиямен сауда бойынша келісімге қол жеткізілгенін жариялады. 

АҚШ президенті алдымен Қазақстандық импортқа 25 пайыздық тариф енгізетінін жариялады, артынша 100 пайыздық кедендік баж енгізу және Ресейдің сауда серіктестеріне  екінші санкциялар салатынын  мәлімдеді.