«Трамптың баж салығы Қазақстанның АҚШ-қа экспортының тек 4,8%-на ғана әсер етеді» — Сауда министрлігі

Қазақстан АҚШ тарапынан қосымша тарифтердің енгізілуіне байланысты келіссөздерді жалғастырып жатыр. Сауда министрлігінің мәліметінше, енгізілген баж салықтары АҚШ-қа қазақстандық экспорттың жалпы көлемінің тек 4,8%-ына ғана әсер етуде, ал қалған 95,2%-ы жаңа тарифтерге жатпайды, деп хабарлайды Orda.kz.

ҚР Сауда және интеграция министрлігі маусым айында осы мәселеге қатысты екіжақты кездесу өткенін хабарлады. Сонымен қатар, Қазақстан АҚШ-қа Дональд Трамптың жарлығын ескере отырып, өзара тиімді сауда ынтымақтастығын дамыту, тұрақты жеткізуді сақтау және нарыққа тең қолжетімділікті қамтамасыз етуге бағытталған ресми ұсыныс жолдады.

«Қазақстан конструктивті ынтымақтастыққа мүдделі, ал АҚШ тарапы әрі қарай диалог жүргізуге дайын екенін растады»,  деп мәлімдеді министрлік. 

Қазақстан АҚШ-қа мұнай, уран, күміс, ферроқорытпалар, тантал, титан, бериллий және басқа да өнімдерді экспорттайды. Бұл жеткізілімдердің негізгі бөлігі жаңа тарифтерге жатпайды және бұрынғыдай шектеусіз экспорттала береді.

Жаңа баж салығына іліккен өнімдер:

• сары фосфор,
• ферросилиций,
• оптикалық линзалар,
• бидай желімі (глютен),
• аммиак селитрасы (аммоний нитраты).
  
  

Сауда министрлігінің деректері бойынша, 2025 жылдың алғашқы жартыжылдығында АҚШ-қа:

• 2,2 мың тонна сары фосфор экспортталған (жалпы өндіріс көлемі – 43 мың тонна),
• ферросилиций — 1482,6 тонна (жалпы өндіріс – 41 830,1 тонна),
• глютен (бидай желімі) — 6500 тонна немесе 8,12 млн АҚШ доллары көлемінде жөнелтілген.
  
  

Аммиак селитрасы АҚШ-қа экспортталмаған.

Сәуір айының ортасында Қазақстан АҚШ-қа  импорттық баж бойынша консультация алу үшін делегация жіберді. АҚШ смартфондар мен компьютерлерді өзара баж салығынан босатты.  АҚШ президенті Дональд Трамп 185 елге баж салығын енгізді. Ал Қазақстанға 27 % салық салынды. Сауда және интеграция министрлігі салынған салыққа қатысты  мәлімдеме жасады.