ШҚО-дағы KAZ Minerals компаниясының Артемьев шахтасы опырылып, кенші қаза тапты

Шығыс Қазақстан облысының Шемонаиха ауданында орналасқан «Востокцветмет» ЖШС-нің Артемьев шахтасында тау жынысының опырылуы салдарынан кәсіпорын қызметкері қаза тапты, деп хабарлайды Orda.kz.

KAZ Minerals баспасөз қызметінің мәліметінше, қайғылы оқиға 30 мамыр күні шамамен сағат 20:30-да болған.

Оқиға болған учаскедегі барлық жұмыс тоқтатылды. Жазатайым жағдайдың мән-жайын анықтау үшін арнайы комиссия құрылды.

«Оқиғаның себептері мен мән-жайын анықтау бойынша құзырлы мамандар мен уәкілетті орган өкілдерінің қатысуымен тергеу жүргізілуде. Компания үшін болған жағдайды толық анықтау және болашақта мұндай қайғылы оқиғалардың алдын алу үшін қандай қосымша шаралар қажет екенін түсіну аса маңызды», деп хабарлады компания өкілдері.

Оқиға орнына KAZ Minerals тобы басқарма төрағасы Андрей Третьяков келді. Компания қаза тапқан кеншінің отбасына барлық қажетті көмек пен қолдау көрсетілетінін мәлімдеді.

Бұл сәуір айынан бері KAZ Minerals кәсіпорындарында жұмысшы қаза тапқан үшінші жағдай. Мәселен, 27 сәуірде «Востокцветмет» ЖШС-нің Орлов өндірістік кешенінің шахтасында тау жынысы опырылып, екі жұмысшы үйінді астында қалған. Олардың біреуі оқиға орнында көз жұмды.

9 мамырда Шығыс Қазақстан облысындағы «Востокцветмет» ЖШС-нің Артемьев шахтасының механигі жөндеу жұмыстары кезінде шамамен тоғыз метр биіктіктен құлап, қаза тапты.

Оқи отырыңыз:

• Қара халықтың «қанын қайнатқан» қолжетпес тариф кімнің қалтасын қампайтып жатыр?
• Еліміз балаларға медициналық көмек көрсетудің гибридті моделін енгізеді
• Шахтада мерт болған кеншілер отбасына нақты қанша жәрдемақы беріледі?