Шахтада мерт болған кеншілер отбасына нақты қанша жәрдемақы беріледі?

Ұлытау облысындағы «Қазақмыс» корпорациясы «Жомарт» кен орнында болған апаттан қаза тапқандардың отбасына жәрдемақы беріледі. Көмек қаржысының көлемі қаза тапқан марқұмның асырауындағы адамдардың санына және ең төменгі күнкөріс деңгейіне байланысты, деп хабарлайды Orda.kz. 

Жәрдемақының бұл түрі 8 жасқа дейінгі баласы бар жұмыссыз үш анаға да тағайындалады. Осылайша асырауындағы бір адам үшін бюджеттен төленетін жәрдемақы мөлшері 42 530 теңге, ал міндетті әлеуметтік сақтандыру қорынан төленетін төлемдер 141 523 теңге болды.

Сондай-ақ, қаза тапқан кеншілер отбасыларының барлығы бірыңғай жинақтаушы зейнетақы қорынан 369 608 теңге мөлшерінде жерлеуге арналған біржолғы төлем алуға құқылы. 

Сонымен қатар апат болған шахтадағы жұмыс 10 күнге тоқтатылды. Ұлытау облысындағы шахта апатына қатысты құрылған Үкіметтік комиссия төрағасы Қанат Бозымбаевтың мәләметінше, қылмыстық іске байланысты комиссия сараптама жүргізетіндіктен шахтада 10 күн бойы жұмыс жүрмейді. Ол комиссия отырысында апаттың себебі анықталған соң шаралар қабылдауды тапсырды. 

«Газоанализатор бар екендігін айғақтайтын дабыл белгісін орнату немесе газды жою бойынша келісімшарттағы міндеттемелерге өзгеріс енгізу қажет деп ойлаймын. Ең бірінші кезекте қауіпсіздік техникасы және жұмысшының қауіпсіздігі сақталуы қажет. 10 күн бойы апат болған орында тек экспертиза мамандарының жүруіне рұқсат беріледі», - деді Қанат Бозымбаев.