ШҚО әкімі бұрынғы орынбасары Жақсылық Омардың сот үкімінен кейін отставкаға кетпекші болды

ШҚО әкімі Жақсылық Омарға шығарылған үкімнен кейін отставкаға өтініш берді. Бірақ жоғарғы тұрған басшылық оны қабылдамады, деп хабарлайды Orda.kz.       

Нұрымбет Сақтағанов өзінің бұрынғы бірінші орынбасары Жақсылық Омар қатысты сот үкімі шыққаннан кейін қызметінен кету туралы өтініш берген.

Бұл туралы ШҚО әкімінің баспасөз хатшысы Лаура Жақыпова мәлімдеді.

«Қолданыстағы заңнамаға сәйкес, Шығыс Қазақстан облысының әкімі Нұрымбет Сақтағанов белгіленген тәртіппен отставкаға кету туралы өтініш берді. Өтінішті қарау нәтижесінде, оның бұл іске қатысы жоқ екені ескеріліп, отставканы қанағаттандырудан бас тарту туралы шешім қабылданды. Облыс әкімінің өңірдің әлеуметтік-экономикалық дамуының барлық бағыттары бойынша қызметі қалыпты режимде жалғасуда» деп жазылған хабарламада. 

3 сәуірде Өскемен қаласының қылмыстық істер жөніндегі ауданаралық соты Жақсылық Омарды алаяқтық және пара алу қылмыстары бойынша кінәлі деп таныды. Сот Омарды 6 жылға бас бостандығынан айыру жазасына кесті.

Заң бойынша, егер саяси мемлекеттік қызметшінің тікелей бағынысты қызметкері сыбайлас жемқорлық қылмысын жасап, оған қатысты айыптау үкімі заңды күшіне енсе, ол қызметінен кету туралы өтініш беруге міндетті. Мұндай отставкаға қатысты  түпкілікті шешімді жоғары тұрған басшылық қабылдайды.

Оқи отырыңыз:

• Өскеменнің бұрынғы әкімі Жақсылық Омар 6 жылға сотталды
• Бұрынғы шенеунік Жақсылық Омар сотта кінәсін толық мойындады
• Өскеменнің экс-әкімі Жақсылық Омар апелляциялық шағым түсірді