Астанада 20 жыл бұрын жасалған кісі өлімі әшкереленді

Елордада 21 жыл бұрын жасалған кісі өлімі ашылды. Мұрағаттағы қылмыстық істі қайта зерделеу нәтижесінде екі күдікті ұсталды, деп хабарлайды Orda.kz.       

2005 жылдың маусымында Астананың шеткі аумағынан зорлық-зомбылық белгілері бар ер адамның денесі табылған. Ол кезде тікелей айғақтардың болмауына байланысты қылмысқа қатысы бар күдіктілерді анықтау мүмкін болмаған.

Биыл криминалдық полиция қызметкерлері осы істі қайта қолға алып, оқиғаның мән-жайын егжей-тегжейлі қалпына келтірді. Сонымен қатар кешенді жедел-іздестіру шаралары жүргізілді.

Нәтижесінде полицейлер қылмысқа Павлодар облысының екі тұрғынының қатысы бар екенін анықтады. Күдіктілер тамыз айында ұсталды.

Ішкі істер министрлігінің мәліметінше, екі күдікті де қылмыс жасағанын мойындаған. Тергеу барысында кісі өлімі жанжал кезінде болғаны анықталды. Сол уақытта күдіктілердің мас  болғаны белгілі болды.

Қазір екі ер адам да қамауға алынды.

Қылмыстық іс бойынша тергеу жалғасып жатыр. Полиция оқиғаның барлық мән-жайын анықтауда.

Оқи отырыңыз:

• Бақытжан Базарбек жол апатынан зардап шеккен азаматтың туыстарымен бірге видео жариялады
• Orda.kz сайтының бұрынғы бас редакторы Гүлнәр Бажкеноваға сот үкімі шықты