Сатиралық пабликтің авторын қорғаған тағы бір белсенді ұсталды

Qaznews24 сатиралық паблигінің авторы Темірлан Еңсебекке қолдау білдірген тағы бір белсендіні полиция ұстап әкетті, деп хабарлайды Orda.kz «Наша газетаға» сілтеме жасап. 

Сергей Зинченко жалғыз өзі Темірлан Еңсебекті қолдап пикетке шықты. Ол жерге әкімдік, прокуратура және полиция қызметкерлері келді. Олар  бейбіт митинг туралы хабарлама алмағанын айтып, пикетті тоқтатуды талап етті. Сергей Зинченко талаптан бас тартқан соң, оны ұстап әкетті. 

Еске салайық, 17 қаңтар күні QazNews24 қоғамдық парақшасының әкімшісі 2 айға қамалды. 19 қаңтар күні журналист әрі Art of Her журналының бұрынғы бас редакторы Руслан Бикетов жалғыз өзі пикетке шыққан еді. Оны да полиция алып кетіп, 15 күнге қамады. 

Кеше, 20 қаңтарда пикетке шыққан журналист Жәпішеваны полиция алып кетіп, 15 күнге қамады. Журналистке «Бейбіт жиын өткізу тәртібін бұзды» (488-бап) деген айып тағылған. Жәпішева сот шешіміне келіспейді. Адвокат Ғалым Нұрпейісов апелляциялық шағым түсіретінін мәлімдеді.