Санкцияны айналып өту тәсілі ме? Еуропалық көліктер Ресейге қытайлық брендпен жеткізіліп жатыр

Ресейге BMW және Audi көліктері қытайлық Changan маркасымен жеткізіле бастағаны мәлім болды, деп хабарлайды Orda.kz.       

Соңғы уақытта Ресей нарығына автокөлік жеткізудің жаңа тәсілі пайда болғаны туралы ақпарат тарады. Мәліметтерге сүйенсек, BMW және Audi маркалы көліктер Changan атауымен тасымалдана бастаған. Бұл схема халықаралық санкцияларды айналып өту әрекеті болуы мүмкін деген пікірлер айтылуда.

Дереккөздерге сәйкес, көліктер Қытай аумағынан жөнелтілер алдында олардың түпнұсқа логотиптері алынып, орнына қытайлық брендтің эмблемалары жапсырылады. Бұл қадам кедендік тексерістерден жеңілдетіп,  санкциялық шектеулерді айналып өтуге бағытталған.

Ал көліктер Ресейге жеткізілген соң, олардың сыртындағы белгілер қайтадан бастапқы қалпына келтіріліп, яғни BMW мен Audi-дің түпнұсқа эмблемалары қайта орнатылады.

2022 жылдан кейін Батыс елдері Ресейге қарсы бірқатар экономикалық санкция енгізді. Соның ішінде автокөлік экспортына да шектеулер қойылған. Нәтижесінде көптеген еуропалық брендтер Ресей нарығынан ресми түрде кеткен болатын.

Алайда нарықтағы сұраныс сақталғандықтан, түрлі балама жеткізу жолдары пайда болған. Соның бірі — параллель импорт. Бұл жүйе арқылы үшінші елдер арқылы тауар жеткізу кеңінен қолданылып келеді.

Автонарық сарапшылары мұндай тәсілдер ұзақ мерзімді перспективада қауіп тудыруы мүмкін екенін айтады. Біріншіден, бұл заңдық тұрғыда күмәнді схема болып саналады. Екіншіден, көліктердің сапасы мен кепілдігіне қатысты сұрақтар туындайды.

Сонымен қатар бренд иелері үшін де бұл беделге нұқсан келтіруі ықтимал. Себебі ресми түрде нарықтан кеткен компаниялардың өнімдері бейресми жолмен сатылып жатыр.

Бұның геосаяси және экономикалық салдары да болуы мүмкін. Бұл жағдай қазіргі жаһандық экономиканың қалай өзгеріп жатқанын көрсетеді. Санкциялар енгізілгенімен, нарық заңдары өз жұмысын тоқтатпайды, сұраныс бар жерде ұсыныс та табылады.

Қытай сияқты ірі өндірістік елдердің логистикалық мүмкіндіктері мұндай балама схемалардың қалыптасуына жол ашып отыр.

Еуропалық автокөліктердің қытайлық брендпен Ресейге жеткізілуі — санкциялардың айналып өтудің жаңа үлгісі ретінде қарастырылуда. Бұл құбылыс халықаралық саудадағы бақылау мен реттеу тетіктерінің әлі де жетілдіруді қажет ететінін көрсетеді.

Оқи отырыңыз:

• Қазақстан мен Ресей президенттерінің кездесуінде не айтылды?
• Қазақстанда Ресей компаниялары көп пе, әлде Өзбекстан алда ма?
• Ресей 2030 жылға қарай автокөліктерге алкоқұлып орнатады