Садыр Жапаров екінші президенттік мерзімге сайлауға түсу жоспарын жариялады

Қырғызстан президенті Садыр Жапаров екінші мерзімге сайлауға түсуді жоспарлап отыр, деп хабарлайды Orda.kz. 

Мемлекет басшысы сайлауға барлық ниет білдірушілер қатыса алатынын және басқа кандидаттар үшін ешқандай шектеу болмайтынын атап өтті.

«Жол барлығына ашық. Кім қатысқысы келеді – қатыссын. Орысша айтқанда, туыңды қолыңа алып, бара бер. Ешкімге шектеу қоймаймыз. Барлығы заң аясында қатаң жүргізіледі», –  деді Жапаров.

Бұған дейін Конституциялық сот Жапаровтың қазіргі алты жылдық президенттік мерзімін бірінші мерзім деп танып, оның 2027 жылы екінші мерзімге сайлауға түсу құқығын растаған. Сайлау заңнамасына енгізілген өзгерістерден кейін кезекті президент сайлауы 2027 жылғы 27 қаңтарда өтуі тиіс.

Бұған дейін ол сайлауға қатысуға ниетті азаматтарға шектеу қоймайтынын да мәлімдеген. Оның айтуынша, елді кім басқаратынын халық шешеді.

Жапаров бұған дейін Қырғызстанның болашақ президенті ретінде Камчыбек Ташиевтің кандидатурасын қарастырғанын айтты. Мемлекет басшысының сөзінше, егер Ташиев сол уақытқа дейін тәжірибе жинап, ел басқаруға дайын болса, өзі 2027 жылғы сайлауға қатыспауды жоспарлаған.

«Менің алты жыл басқару жоспары болды. 2027 жылы өзім сайлауға қатыспай, егер ол дайын болса, тәжірибе жинаса, жұмысын жақсы атқара бастаса, Камчыны президент етемін де, өзім демалысқа кетемін деп ойлағанмын. 2027 жылғы қаңтарда сайлау өтуі керек. Мен оған бұл туралы 2-3 жыл бұрын айтқанмын»,  деп атап өтті ол.

Оқи отырыңыз: 

• Тәшиев 2027 жылы президент болуы мүмкін еді: Жапаров өз жоспарын ашып айтты
• Колумбиядағы жер сілкінісінен қаза тапқандар саны 280-нен асты