Рыбакина өзін нағыз қазақ санайды - Стефано Вуков

Қазақстандық теннисші Елена Рыбакинаның бапкері хорват Стефано Вуков спортшының азаматтығын өзгертуге қатысты пікір білдірді.

Вуков Рыбакина өзін нағыз қазақ сезінетінін атап өтті.

«Еленаның Қазақстан теннис федерациясымен ұзақ тарихы бар, олар оған көп көмектесіп, жеңісімен құттықтады. Мен оның өзін нағыз қазақ сезінетініне сенімдімін» деп қосты жаттықтырушы.

Бапкер теннисшінің азаматтығын өзгертуге қатысты даулы мәселелерге үйреніп қалғанын, бірақ қоғамның неге оны қазбалап жатқанын түсінбейтінін айтты.

«Елена 2018 жылы азаматтығын қазақстандыққа ауыстырғалы бері біз даулы мәселелерге үйреніп қалдық. Бірақ, шынымды айтсам, бәрі нені қазбалап жатқанын түсінбеймін? Өйткені, бұлар теннисшілер. Ал жалаудың еш мағынасы жоқ» деді ол.

Елена Рыбакина

Елена Мәскеу тумасы, 2018 жылға дейін теннисші Ресейдің атынан шыққан. 2018 жылдың маусымында Рыбакина азаматтығын ауыстырды. Қазақстан теннис федерациясының президенті Болат Өтемұратов спортшының спорттағы мансабын 18 жасында аяқтағысы келгенін айтты.

9 шілдеде қазақстандық теннисші Елена Рыбакина Уимблдонда жеңіске жетіп, беделді турнирде жеңіске жеткен тұңғыш ел өкілі атанды. Жеңіске қарамастан, оның WTA рейтингі өзгерген жоқ - ол 23-ші орында қалды. Себебі соңғы Уимблдон турнирінде Ресей мен Беларусь теннисшілерінің жарыстан шеттетілуіне байланысты рейтингтік ұпайлар ойнатылмады.