«Ресейлік партия керек емес»: Грузия халқы президентімен бірге митингіге шықты

Грузиядағы парламент сайлауында билік партиясы «Грузин арманы» 53,92% дауыс жинады. Сайлау нәтижелерімен келіспеген оппозициялық партиялар жаппай наразылық шараларын өткізетіндерін жариялаған болатын. Қазір жұртшылық ереуілге шығып, Тбилиси полициясы ерекше әбігерге түсіп жатыр.

Orda.kz тілшісі мән-жайды саралап шықты.

Сонымен сайлаудан  соң Грузияда оппозиция қайтадан парламенттік сайлау өткізу талаптарымен көшеге шықты.

Бұл бастама президенттің шақыруымен жүзеге асуда. Мыңдаған адам Тбилисидің басты даңғылы - Руставеллиді жапты.

Митингіге президент Саломе Зурабишвили де қатысты. Оппозиция мен президент «Ресейдің жақтасы» болған партияның  сайлаудағы жеңісіне қарсы.

Олар «халықаралық сайлау әкімшілігі басшылығынан» жаңа сайлау өткізуді талап етіп жатыр.

«Грузин арманы» партиясына ресми түрде шамамен 1,1 миллион сайлаушы дауыс берді, бұл оған парламентте шамамен 88 орын алуға мүмкіндік берді. «Өзгерістер үшін коалиция», «Бірлік — Ұлттық қозғалыс», «Мықты Грузия» және «Гахария Грузия үшін» сияқты оппозициялық блоктар барлығы 37,5% дауыс жинап, 62 орын алады. Басқа партиялар бес пайыздық шекті жеңе алмай, парламентке кірмей қалды. «Грузин арманы» партиясының жеңісін жұрт құптамады. Оппоненттері партияны сайлауды қолдан жасады деп айыптады. Грузия президенті Саломе Зурабишвили сайлаудың өткізілгенін мойындамады.

«Мен бұл сайлауды мойындамаймын. Оны мойындау мүмкін емес. Бұл Ресейдің келуін мойындау, Грузия Ресейге бағынады дегенмен бірдей. Біз Ресейдің арнайы операциясының куәгерлері әрі құрбандары болдық. Бұл біздің халыққа, мемлекетімізге қарсы жасалған жаңа гибридті соғыстың бір түрі», — деді президент.

Зурабишвилидің пікірінше, дауыс беру нәтижелерін «Грузин арманы» партиясының пайдасына «толығымен қолдан жасап, жығып берген». Оппозициялық партия жетекшілерімен кездесуден кейін президент 28 қазан кешке Тбилиси орталығында өтетін наразылық митингін жариялады және бар азаматтарды шараға қосылуға шақырды.

Ал «Грузин арманы» партиясы Ресейге қатысты позициясына деген айыптауларды жоққа шығарып, өздерін «бейбітшілік партиясы» ретінде сипаттап, кремльмен конструктивті диалогқа ұмтылатынын мәлімдеді. Партияның алдын ала сайлау бағдарламасында премьер-министр және сайлау штабының жетекшісі Ираклий Кобахидзе ұсынғандай негізінен азаматтардың әлеуметтік жағдайы мен бюджет көлемін ұлғайту туралы айтылды. Партия тиімділігі туралы аргумент ретінде 2012 жылғы және одан кейінгі азаматтардың өмір статистикасын келтірді. Мысалы, 2012 жылғы бюджет көлемі 8,5 миллиард лари болса, 2024 жылы — 27,8 миллиард лариға жеткен. Сондай-ақ, оның айтуынша, партия арқасында жұмыссыздық 13% -ға дейін екі есе төмендеген.