Ресейдің әскери техникасы Қазақстанға кірді: Тұрғындар дабыл қағуда

21 қазан күні сағат 11:00 шамасында Ресейдің мемлекеттік туларымен және «Z» таңбалары бар жүк көліктері мен зымыран қондырғылары бар ресейлік әскери техника Қазақстанның Бөкейорда ауданы Сайхин елді мекеніне кірді.

Orda.kz редакциясына сол жердің тұрғыны хабарласып, бейнежазбалар жіберді.

Зымыран қондырғыларының бірі (шамамен С-300) газ құбырына зақым келтірген.

Тұрғындар ресейлік әскери күштердің аудан орталығында емін-еркін жүргеніне қатты наразылық білдірді. Тұрғындар билік өкілдері, полиция, шекара қызметі мен ҰҚК ешқандай әрекет жасамағанына наразы.

16:18-де Бөкейорда ауданының әкімі Нұрлыбек Даумов ресми түсініктеме берді. Оның айтуынша, әскери техника жауын-шашын мен жолсыздыққа байланысты белгіленген маршруттан ауытқып, Сайхин арқылы өткен. Техниканың бірі газ құбырына зақым келтіргенімен, айтарлықтай зақым немесе газдың шығуы болмапты. Әкімдік оқиғаның мән-жайын анықтап, кінәлілерді жауапкершілікке тарту мәселесін қарастырып жатыр.

Еске сала кетсек, Ресей жалға алып, әскери сынақ өткізіп жатқан Бөкей ордасы аумағындағы радиация мөлшерлемеден 4 есе асып кетті. Тұрғындар бұған биліктің еш қарекет жасамағанына наразы болып отыр. Orda.kz тілшісіне сұхбат берген белсенді Бөкей ордасының тұрғыны Нағым Тәжімұратов өңірде 112 мүгедек бала бар, 400-дей адам радиация әсерінен мүгедек ретінде тіркелгенін айтып дабыл қаққан болатын.

Ал Қазақстан экология және табиғи ресурстар министрлігі Orda.kz сауалына жауап беріп, Ресей Федерациясына жалға берілген әскери полигондар орналасқан Батыс Қазақстан облысында экологиялық заңнаманың бұзылғанын растады. 

Ал сыртқы істер министрлігі біздің сауалымызға жауап қайтармады.